بطلها .. نادر الوجود

بالأمس القريب كرم الدستور الشاعر الكبير والكاتب الصحفي الأستاذ جمال بخيت.. كانت ليلة من ألف ليلة وليلة.. مش بس لأنها جميلة ومميزة ولكن لأنها مش بتحصل كتير لأن بطلها نادر الوجود وصعب التكرار.. الليلة كانت عبارة عن دروس في الإنسانية.. ومواقف من اللي بتعلمك ازاي تقوى وتكمل بدون ما تفقد إنسانيتك.. ناس كتير من كل مكان في العالم ومن كل المجالات مش بس في مجال الكتابة والإبداع.. اتكلموا عن أنه ازاي أستاذ جمال دعمهم وساعدهم.. وازاي أنه أثر في حياتهم لحد النهاردة.. والمواقف مكانتش مقتصرة على الشباب فحسب انما كانت بتشمل شخصيات عامة ومرموقة وسنهم مش صغير وربما في سن الكهولة.. في يوم من الأيام أستاذ جمال بخيت كان رئيسي في العمل وكنت لسه بالقلم الرصاص وبالمناسبة هو اللي ثبتني في روزاليوسف وعيّني وبسببه انا الآن انتمي لمؤسسة صحفية كبيرة ومرموقة وافخر دائما بهذا الانتماء.. 

في يوم من الأيام أستاذ جمال كلفني بتغطية حدث عظيم كان يحدث في محافظة أسيوط.. وقالي مين الضيوف اللي هيحضروا هذا الحدث معايا وهيسافروا معايا من القاهرة إلى أسيوط وكان من ضمن الأسماء عمي واستاذي الموسيقار الكبير هاني شنودة والدكتور حسام عطا وغيرهم من الشخصيات العامة والمرموقة.. والمفروض ان كان في اتوبيس هيكون منتظرنا في مكان ما في تمام التاسعة صباحاً.. روحت قبل معادي بحوالي ربع ساعة وفضلت منتظرة كمان نص ساعة ومفيش اتوبيس ومفيش حد جه ينتظر معايا ف لما سألت قالولي الاتوبيس اتحرك الساعة 8 والضيوف كلهم اتحركوا معاه.. مقولتش وقتها خلاص بقى الاتوبيس فاتني اروح البيت اكمل نوم وخلاص.. سألت ازاي اركب لاسيوط ف قالولي هتروحي احمد حلمي ومن هناك هتاخدي عربية هتوصلك اسيوط.. 

مكانش معايا غير أجرة العربية اللي هتوصلني من المكان اللي انا فيه لاحمد حلمي فقط لا غير.. ف اتصلت بعمي هاني شنودة قولتله قالي تعالي وهستناكي مكان م العربية هتنزلك.. وفعلا اول م ركبت قولت للسواق ان انا مش معايا فلوس ادفع بس اول م اوصل عمي هيحاسبك.. السواق ولسبب غير مبرر بالنسبالي كان مصر انه انا هوصلك ومش عايز منك فلوس.. المهم وصلت ولقيت عمي هاني شنودة مستنيني بس مش لوحده هو وكل المهرجان والمقيمين عليه والمنظمين 😂😂😂.. وطبعا معاه دكتور حسام عطا كانو كذا عربية واقفين ورا بعض مستنيين المكيروباص اللي جي م القاهرة وطبعا كانت خناقة مين اللي هيحاسب الراجل.. وقتها الراجل حس انه كان مركب حد مهم جدا وهو مش دريان.. المهم حضرت الايفينت وعملت حواراتي الصحفية وخلصت كل شغلي وتاني يوم اتحركنا من اسيوط ورجعت سلمت الشغل.. محكتش ولا كلمة من اللي حصل لأستاذ جمال.. هما حكوله وهو لحد النهاردة مجابليش سيرة.. بس طبعا صرفلي وقتها مكافأة دفعتلي ايجار بيتي شهر كامل وزيادة.. 

الخلاصة أن اي مسؤول ممكن ياخد عيون موظفينه بس بالإنسانية والحب الصادق والاحتواء.. 

أستاذ جمال بخيت كان قادر يحقق المعادلة الصعبة جدا دي بكل بساطة.. 

تستاهل تكريمات اكتر يا أستاذ والله.. وأنا دائماً اشكر القدر انه قابلني بيك وحطك في طريقي.. الحمد لله على نعمة وجودك في الحياة 💚💚💚