من بعد م بقيت أُم مبقتش عارفة اشكر أمي ازاي.. ولا اكتبلها.. مبقتش لاقية كلام يعبر عن تعبها.. اه كنت مقدراها وعارفة انها تعبت.. بس بعد م عشت كل اللي هي مرت بيه.. وكانت بتحس بإيه لما بنتعب.. ولما بنفرح.. ولما يننجح.. ولما بنزعل.. مبقتش عارفة اكتبلها.. 

أُمي ست استثنائية.. عاشت حياتها كلها راجل وست.. أب وأم.. علمتنا كل حاجة في الدنيا.. اديتنا عُمرها وصحتها وشبابها.. والمهم أننا بخير وسعداء في حياتنا.. مرت بظروف كتير صعبة.. واحساسيس أصعب من اللي بتحتاج مشاركة وسند وكانت واقفة فيها لوحدها.. تشوفها تقول ايه الست القوية دي جبل مبيتهزش.. بس تبقى معانا دموعها تنزل لوحدها..

كنت صغيرة أوي.. في أولى اعدادي.. وكتبت قصيدة.. أول قصيدة كتبتها كانت يوم ٢٠ مارس.. مكانش قصدي اكتب شعر.. بس كنت عايزة أقول للدنيا كلها قد ايه الست دي تعبت وعانت واتحملت فوق طاقتها كتير.. كتبت كلام صعب جدا وكبير على طفلة في سني وقتها.. بس هي اللي خلتني اكتبه..  

أمي هي جمهوري الأول والأخير.. أول شخص بسمعه اي حاجة يكتبها وبيهمني رأيها جدا.. مع انها اول حاجة بتعملها انها تبكي.. بس بحب اسمع رأيها.. 

هي جيشي الوحيد.. أول وآخر شخص بيدافع عني بدون م بيسمع المشكلة.. مش محتاجة تسمع حاجة عشان تدافع عني..

أول وآخر صوت بسمعه في يومي.. احلى " مودي" بتناديني بيها هي..

ولسه بخطف من عيونها النظرة كلام.. لسه بكتب الشعر من عينيها ونظرتها..

كبرت وبيتقالي " ماما".. بس لسه ايدي متشعلقه في ديل فستانها.. 

لما لويس جريس ربنا اختاره جنبه.. اول شخص كلمته وفضلت ابكي في التليفون.. كانت امي..

ولما ابويا ربنا اختاره جنبه.. اول شخص كلمته أمي.. 

ولما بنجح.. ولما بسقط ولما بزعل ولما بفرح.. لحد دلوقتي.. 

بس اللي اختلف اني بطلت اقول الحاجات اللي تزعلها.. ف من اول م اقولها آلو ايوا يا ماما.. تقولي مالك صوتك في ايه؟!.. ساعات معرفش امسك نفسي وأبكي وساعات اقولها انا كويسة مفيش حاجة.. وطبعا مبتصدقنيش.. وبتبقى واثقة اني زعلانة.. 

أمي.. يا نعمة.. كل لحظة وانتي كل حاجة في حياتي.. وكل لحظة وانتي حياتي.. كل لحظة وانتي قوتي وسندي وضهري.. وحسك في الدنيا بالدنيا.. يا اجمل واعظم نعمة ربنا وهبهالي.. 

أول قصيدة كتبتها : 

بهاجر وبرحل 

بلف وبسافر 

بموت كل لحظة وبرضو بعافر 

يهاجر سواد

ويخلق صباح

وتطلع عيون الحقيقة شباح

سكنت القبور

طلعت الشموس ومش شايفة نور 

كتبت بايديه نهاية الآنين 

واتارى انينى بيخلق جنين 

ضحكت ودموعى بتجرى بحور 

وقمرى بيسكر ونجمى يدور 

وحلمى بيصغر وبكرة يزول 

وبعده دا ساقية تعذب ف تور 

وفين الحبايب 

وفين العمام 

مافيش أب واعى ولا فرح دام 

مافيش غير عينيكى 

تنور طريقى 

وتفتحلى سكة لبكرة اللى جاى 

وبعده ف حضنك انام يامّه واحلم 

وارجع كطفل فـ يوم الميلاد

اسافر بلاد

بلاد وبلاد

مافيش غير عينيكى ف كل الساعات 

وبسمع نداكى ف عز السكات 

مافيش غير عينيكى 

تنور طريقى 

وتفتحلى سكة 

لبكرة اللى جاى