الحكي هو أسلوب من أساليب العلاج.. يعني لما بتحكي عن حاجة مضايقاك بتعالج نفسك منها بدون ما تشعر وخصوصا لما تحكي مع حد قريب منك.. طبعا الواحد مش بيحكي بغرض العلاج وقتها.. قد م بيحكي عشان بيبقى مصدوم.. او مش مصدق الخيانة.. او مقهور من اللي حصل.. لكن انا اكتشفت غرض جديد جدا للحكي وهو اللي الطرف التاني وصلني له للأسف.. 

وانا بحكي اكتشفت ان انا بتكلم عشان اللي قدامي يأكدلي ان الانسانة دي كانت فعلا في حياتي وكانت فعلا يبان عليها انها بتحبني وبتخلصلي.. ببقى عايزة اسمع ان القصة كلها على بعض مكانتش من وحي خيالي.. كانت ناس بجد وحقيقي.. 

تخيل الصدمة اللي ممكن انسان يصدمها لأخوه.. يبقى قاصد انه يجننه.. 

لما فجأة وبدون أي مقدمات شخص يتحول ١٨٠ درجة.. ويسيبك سنين تسأل نفسك هو انا عملتله ايه عشان يبقى كده.. متلاقيش انك عملت غير كل خير.. وتفضل محتار تسأل ربنا ليل نهار.. طبعا مفيش داعي اني اقول ان انا بفتكرهم في كل صلاة وفي كل وقت بكلم ربنا واحكيله قد ايه زعلانة من الخيانة وسنين عمري اللي اخلصتلها فيها.. بس انا متأكدة ان ربنا سامعني كالعادة.. وبيرد عليا.. 

معرفش ممكن شخص يستفيد ايه من الأذى النفسي اللي ممكن يسببه لأقرب الناس ليه؟!