الذي انكسر

بحب شوارع وسط البلد جدا.. جاردن سيتي تحديداً.. أولاً لأني عشت هناك فترة كانت من أجمل أيام حياتي.. ثانياً لأن كل شارع فيها شاهد على حكايات كتير قوي.. شاهد على نيتي الطيبة وصدقي وحبي لناس خذلوني.. وشاهد على خيانتهم ليا.. وشاهد على دموعي وقلة حيلتي.. وشاهد على شكوتي من ظلمهم ليا.. أحيانا بتخيل أن لو الشوارع نطقت هتعمل ثورة.. ثورة ضد الظلم اللي شاهدين عليه واللي شافوا بعينهم وسمعوه بودانهم.. ثورة ضد كسر الخاطر اللي اتعرتضله.. 

اللي اتكسر مبيتصلحش.. ولو مر عليه سنين هيفضل مكسور.. واللي يهون عليه انه يكسر خاطرك ويجرحك ويدوس عليك ويرخصك متستناش منه انه يداويك او يطبطب عليك.. 

ربنا هيشربه من نفس الكاس وهيكسر خاطره وهيفكره باللي عمله فيك.. ومفيش حاجة بترجع زي الأول.. الليلة اللي عدت عليا وانا دموعي منشفتش فيها من على خدي.. قومت الصبح بحته ميته جوايا من ناحية الشخصية اللي آذتني.. الموضوع بياخد وقت جوانا.. وممكن ميموتش أبداً.. انا فاكرة كل حاجة بالتفاصيل المملة.. بأدق التفاصيل.. كسر الخواطر صعب متفتكروش انكم مهما عملتوا ربنا هينساه او يعديه او يغفل عنه.. اللي كسر هيتكسر.. واللي اتكسر هيتجبر وهيتطبطب عليه وربنا هيمسحله دموعه بفرحه كبيرة قوي.. طول م هو بيقول يارب ربنا مش هيسيبه مكسور أبداً..