في ناس مبعرفش اتكلم عنهم.. ويمكن كمان اتحاشى ان تيجي سيرتهم في أي مكان او اي جلسة ومع أي حد.. ولو جات سيرتهم ضربات قلبي في أقل من ثانية تعدي المليون وكأني طلعت جبل الجلالة ونزلته في خطوتين..
من كتر ما بحبهم ورافضة أنهم ميبقوش موجودين جنبي بلحمهم ودمهم .. ولو أني مؤمنة تماماً أن في ناس مش بتموت.. وأن الجسد مش كل حاجة والروح حضورها قوي ومؤثر ويمكن أهم بكتير..
بقول المقدمة الطويلة دي لأني بقالي فترة بصحى من النوم وبنت عمي عبد الرحيم في بالي وبصحى أفكر فيها وكأني كنت سهرانة معاها طول الليل.. وأول م افتح عيني اتصفح السوشيال ميديا مثلا ف الاقي اول بوست لوحدة اسمها "عالية" مثلا على اسمها.. او صديقتها في المدرسة.. او حد باعتلي ع الانبوكس يسأل على ولاد عبد الرحيم منصور ف اضطر أقول إن في عالية بس ربنا اختارها في جنته.. الحكاية دي بقالها فترة بتحصلي ولذلك قررت النهاردة أكتب عن " عالية".. احكيلكم هي قد ايه كانت ملاك ونسمة صيف وحلم جمييييل جدا بس قصير جداً..
كانت صديقتي رغم فرق السن..
وآخر مرة سمعت صوتها قالتلي تعاليلي بس ملحقتش اشوفها..
كانت بتكتب شعر " فصحى" وكانت بتاخد جوايز دولية عليه.. لأنها كانت شاعرة كبيرة وعظيمة جدا وليها اسلوب بسيط ومميز وعميق في نفس الوقت..
هي كلها كانت مميزة جداً.. صوتها جميل لحد دلوقتي وأنا بكتب البوست سامعاه في ودني.. ورقيقة جدا.. عالية كانت أرق من الحياة بكتير..
كتبت كتير في رثائها بس لسه مكتبتش اللي جوايا..
عالية وعبد الرحيم وحمدي ولويس حببوني في أماكن بعيدة اتمنى أوصلها عشان اشوفهم💚💚💚🍀🍀🍀
"عالية" يا أشجار الربيع من غير ورق
"عالية" يا شمسات الصبا بعد الغروب
"عالية" يا نجمة فـ السما عاشقة الهروب
لدروب م يوصلها الصباح
ولا صوت ديوك
وبلاد يدفيها الشتا
دبلت عناقيد العنب
من قبل ما يجف العرق
"عالية" يا أشجار الربيع من غير ورق
2
-2
