جريمة الحلاق الجزء الرابع والاخير

 بس أنا اخاف يا بيه ده وهو بيديني ال٥٠٠ جنيه كانت عينه كلها شر 

ـ متخافش احنا مراقبين كل حاجه بس انت متبطلش زن عليه انك عايز بقية فلوسك 

ـ حاضر يا بيه 

حسيت أن رغم كنت استبعدت اخوه من الاول بس بعد ما الأحداث دي والمعلومات اللي عرفتها لازم اركز معاه اكتر وتزود المراقبة عليه لأن لحد دلوقتي هو الوحيد اللي عنده دافع للقتل 

بعد اسبوع من المراقبة موصلناش لاي نتيجة 

رحت لاشرف مكتبه اشوف فيه حاجه جديدة عرفها ولا لا

ـ مفيش اي اخبار جديده 

ـ لا عم فتحي عمل زي ما قولنا بالظبط وبقى يوميا يتصل بيه علشان بديله باقي الفلوس ومفيش فايده وفي الاخر قاله عايز تروح تقول على خلافي مع اخويا للحكومة روح قول مش معايا فلوس ادهالك 

ـ تمام كده مفيش ادامنا غير المواجهه نجيبه هنا ونضغط عليه ونواجهه بالخلافات اللي بينه وبين اخوه وبكل حاجه عرفناها سعتها يمكن ينهار ويعترف 

ـ شكلها مفيش حل غير كده 

وفعلا جبناه وانا وأشرف واجهناه بكل حاجه بس أنكر وقالنا ـ يا بيه احنا اه كانت خناقتنا كتير بس ده اخويا اللي مليش غيره مستحيل اعمل كده ولا بيت ولا فلوس تخليني اعمل كده ابدا 

ـ ادام انت شايف نفسك برئ ليه استسلمت لتهديد عم فتحي وأنه هيقولنا بالخلافات اللي بينكم ورحت دفعتله الفلوس 

ـ أنا مكنتش هديله حاجه مفيش حاجه اخاف منها ومعملتش حاجه بس مراتي بها ربنا يسامحها أعدت تزن عليا وأننا عندنا بنت وسمعتها هتبوظ لو الناس عرفت أننا كل شويه نروح الاقسام واني لازم ادفع دين اخويا فدفعله كل اللي حيلتي ورفضت ادفعله حاجه تاني يا بيه مش بعيد أنه يكون هو اصلا اللي قتل اخويا 

ـ عندك دليل

ـ لا بس هو كان يعرف كل حاجه عن اخويا اكتر مني يمكن يعرف أن اخويا معاه فلوس أو دهب مخبيهم في حته 

ـ على العموم هنشوف الموضوع ده وهنتأكد وكل واحد هياخد جزاؤه

وبعد تحقيق استمر ٣ ساعات كان كلامه زي ما هو متغيرش وأنه برئ وبيحب اخوه رغم الخلافات 

وبعد شهر من التحقيقات ومراقبة كل اللي ليهم علاقه بالمجني عليهم مكنش فيه اي جديد 

ـ وبعدين يا اشرف هي القضية هتتقيد ضد مجهول ولا ايه 

ـ مستحيل اكيد فيه ثغرة للقاتل انت عارف ان مفيش حاجه اسمها الجريمة الكاملة

وسمعنا دوشة جامدة اوي بره وخناقة كبيره على باب المكتب جريت فتحت اشوف فيه ايه 

لقيت رجل عنده خمسين سنه ماسك ولد عنده حوالي ١٧ سنه ونازل ضرب فيه 

سكتناهم ودخلتهم المكتب علشان اشوف فيه ايه 

وسبب الخناق 

قولت للراحل الكبير ـ اسمك ايه وبتضرب الولد ده ليه؟

ـ ده نصاب يا بيه باعلي دهب على القهوة وخد مني ١٥ ألف جنيه على أساس نص السعر وأنه كده كارمني وفي الاخر اروح ابيعه يقلولي في الصاغة أنه دهب صيني ده انا هموته ويرجع الراجل يضربه 

الولد بصريخ ـ أنا مليش دعوه والله سيبني بقى 

زعقت فيهم علشان يسكتوا هم الاتنين ويفهموني ايه اللي حصل بالظبط وشاورت للولد وقولتله ـ اسمك ايه وعندك كام سنه 

ـ اسمي مصطفى وعندي ١٧ سنه 

ـ قولي ايه الحكايه كده من الاول 

ـ يا بيه أنا مليش دعوه بحاجه سيبوني 

الراجل اتعصب جامد وضربه بالقلم وقال ـ أنا عندي شهود يا بيه كل اللي في القهوة شافوه اصلا وكان عايز يبيعلهم الدهب ده ومحدش وافق أنا اللي طلعت غبي واشتريته منه 

الولد اعد يعيط جامد رحت اديته ميه وقولتله ـ أهدى خالص قولي مين اداك الدهب ده واحكيلي الموضوع من الاول خالص وانت هتبقى شاهد وهتطلع براءة 

قالي أنا يا بيه ليا اتنين أصحاب سمير وطارق 

واحنا التلاته فقرا ومش بيكون معانا حتى حق السيجارة وكان طارق دايما يحكيلنا أنه ليه بيت من دورين بتاع جده لو اتباع هيبقى غني بس عمه واقفلهم في البيعه ومش راضي يبيع وبيديهم كل اول شهر ملاليم وأبوه اتخانق معاه كتير بسبب الموضوع ده بس هو منشف رأسه ومش راضي يبيع 

ـ عمه ده حلاق يا مصطفى

ـ ايوه يا بيه 

ـ حلو اوي كمل 

ـ في يوم سمير قال لطارق أنه جتله فكره أننا نروح لعمه ده ونهدده يعني علشان يمضي على تنازل وسعتها كل مشاكلنا هتتحل

وفعلا يا بيه روحنا اليوم ده ولبسنا جوانتيات علشان ميبقاش فيه بصمات ولو بلغ عننا ننكر وأنه أتنازل بإرادته ورحنا يوم الاثنين علشان ده يوم اجازته من المحل وطارق خبط وفتحله ودخل وكلنا دخلنا معاه 

رحب بينا في الاول على أساس ابن اخوه وأصحابه وبعدين طارق فتح معاه موضوع البيت وأنه عايزه يبيعه ماهو مش معقول يبقى عنده أملاك ومش عارف يجيب سيجاره حتى 

المهم يا بيه عمه اعد يشتمه جامد اوي وطردنا 

جه سمير مسكه كتفه وطارق طلع التنازل وهدده أنه لو مش هيمضي هيقتله اعد يزعق جامد وشتمنا كلنا فسمير ضربة وزقة جامد وقع تتخبط على دماغه في طرف الترابيزة وسعتها لقينا مراته كانت طلعا من الحمام وشافتنا فجريت على الباب وطلعت على السلم تصرخ فطارق جري وراها وخنقها جامد من رقبتها لحد ما وقعت وماتت 

وقتها مكناش عارفين نعمل ايه مكنتش دي نيتنا يا بيه كنا عايزين نهدده وبس والله 

ـ والدهب جبتوه منين 

ـ مراته كانت لبساه طارق قلعها الدهب كله وجرينا بسرعة 

ـ وبعد كده عملتوا ايه؟

ـ طارق قالنا نستنى شويه لما التحقيقات تهدى ونحاول نبيع الدهب ده ونقسك فلوسه علينا انا وسمير النص وهو النص 

ـ واشمعنا انت اللي ادهولك تبيعه 

ـ هو قالي أني ابيعه علشان يعني هو معروف أن عمه ومراته لسه مقتولين وممكن الناس تشك فيه وقالي ابيعه لأي حد بلاش الصاغة علشان ممكن يشكوا يعني علشان سننا صغير 

يتعصب الراجل ـ أنا عايز حقي يا بيه من قتالين القتلة دول 

ـ الحق كله هيرجع لأصحابه متقلقش 

وفي نفس الوقت أمرنا بالقبض على سمير وطارق وطبعا بعد استجوابهم محدش فيهم قدر ينكر واعترفوا بالجريمه الكامله اللي قتلوا روحين علشان خاطر في الاخر دهب صيني للاسف وتمت محاكمتهم الثلاثة بتهمة القتل العمد مع سبق الاصرار والترصد ..