ندى !! ست أرمله و عندها ٣ أطفال ، و برغم كل تعبها ف شغلها طول اليوم ف مصنع الملابس لكن كانت دايماً فى حاله رضا و سعادة مستمرة ، دة غير البسمة اللى عمرها ما فارقت ملامحها ، ف مرة جات صديقتها ف المصنع و سألتها ( انتى إزاى دايما سعيدة و ملامحك هاديه كدة ) ؟

كان رد ندى أنها شايفة السعادة حواليها فى كل خطوة بتخطيها .

شيفاها ف ضحكة أولاها وهما بيتغدوا مع بعض .

شيفاها ف كوبايه الشاى بالنعناع و هى بتشربها مع جارتها بلليل ، وسط رغيهم و ضحكهم مع بعض .

شيفاها ف معونه الخالق ليها ف تسديد كل احتياجات بيتها .

و الأهم أنها شيفاها جوه رضا غير عادى بقضاء الله وقدره ف حياتها .

يمكن مشكله أغلبنا هى إننا بنربط السعادة بأسئله كتير ملهاش نهايه ولا ليها حتى أجوبه جوانا ..

زى مثلاً { أمتى أنجح ،، أمتى أتجوز ،، أمتى أحب و أتحب ،، أمتى أرتاح سواء من تعب جسدى أو نفسى ،، أمتى أحقق حلمى ،، و أمتى ،، و أمتى } ؟ 

و نسينا إن السعادة مشاعر داخليه و عميقة جداً صعب بل يمكن مستحيل العالم الخارجى يقدر يوفرهلنا طول ما هى مش نابعة من جوانا !

طيب تعالو كدة نسأل بعض سؤال داخلى شويه و هو ( إيه هى السعادة ) ؟؟

السعادة ف رأيى الشخصى هى مشاعر داخليه بالرضا الشامل سواء 

• الرضا عن 

~ نفسك ..

~ شكلك ..

~ رزقك ..

~ أهلك .. 

~ و ربك .. اه ربك لأن فى ناس دايما ترمى كل الملامة و الأخطاء على الله ، مع إنه صانع الخيرات .

• الإمتنان و الشكر 

دة كمان نوع من أنواع السعادة ف إنك تشكر ربك على كل ما صنعة من الكون لخدمتك .

صدقنى يا عزيزى السعادة عمرها ما كانت ف ممتلكات ولا صحبه ولمه كدابه ولا حتى كلام مزيف وسط علاقات بتتغذى على المصالح البحته .

• ياما ناس عندها كل مقاومات السعادة الشكليه ،، ولكن جواها حزن عميق جداً ف مغزاه .

• وعلى عكسهم ناس لسه ماشيه ف أول طرق الحياة و جواها سلام و سكينه نفسيه قادرة أنها توزع طاقة السلام و السعادة لكل شخص تتعامل معاه و لو ببسمة هادئه مع كلمة شكر بسيطة .

• و ناس تانى عايشة حياتها تلهس يمين و شمال بتجرى و تدور على السعادة و كأنها أبرة ف كوم قش !!

و زى ما تكون وقفه قدام مغارة على بابا مستنيه المغارة تتفتح علشان تلاقى الكنز المسمى بالسعادة ، من غير أى مجهود منها أنها تدور عليها جواها .

و نسينا إن السعادة ساكنه فينا من أول يوم إتخلقنا و إتوجدنا في الحياة .

تعالوا بقى ندخل لسؤال أكتر عمق و انا متأكدة أن مفيش حد مسألش نفسه أو شخص غيره السؤال دة وهو ( هل السعادة قرار ) ؟

ناس كتير بتقول :-

" آه السعادة قرار ، و لازم تعيش مبسوط " 

لكن في الحقيقة محدش يقدر يقرر إنه يضحك و هو موجوع .. ولا يفرح و جواه حزن عميق .

طيب إيه رأيك نحاول نسميها قدرة .. بمعنى ...

• قدرتك على ( التسامح و المغفرة ) لكل شخص آساء التعامل معاك أو حتى فهمك غلط ف يوم الأيام .

• قدرتك على ( إحتواء ) لحظات الضعف اللى جواك و تجاوز الألم الداخلى .

• ( إصرار ) على تخطى الألم و نسيان الماضى ، بكل أوجاعه .

وقتها بس هتعرف إن السعادة حقيقى جواك ، مش محتاج أبداً إنك تدور عليها بره روحك .

تعالوا كدة نعمل شويه تمارين تأكد كلامى إن السعادة جوانا إحنا و مش هنستمدها من حد تانى .

لو نفسك تحس بالسعادة تعالوا ندخل لرحله نفسيه عميقة و نجرب حبه خطوات صغيرة نعملها سوا .

١- أول ما تصحى من النوم أشكر ربك و أطلب منه المساندة طول اليوم .

٢- أبتسم ف وش كل الناس اللى تشوفها حتى لو متعرفهاش ، و على دة مش هبل ، لكن دى روح نقيه و بساطة شخصية حاول تكتسبها .

٣- قرر تعمل أى حاجة و لو بسيطة تفرحك ، من جواك و تكون مشاعر حقيقية مش مزيفة .

٤- قبل ما تنام أكتب كل حاجة حلوة حصلت معاك في يومك ، و حاول تكررها تانى يوم .

٥- أكتب كل مشاعرك و كنت حاسس بأية وقتها و إزاى هتقدر تغيرها للأحسن .

٦- ادخل أوضتك بعد يومك الزحمة من الشغل و العلاقات و أطفى النور و خد نفس عميق و حس بهدوء عقلك ، و صوت أنفاسك و استرخى شويه .

٧- أسمع الموسيقى اللى بتحبها و غنى كمان معاها بصوت عالى لو دة يسمح .

٨- لما تضايق أسأل نفسك ( أنا محتاج إيه دلوقتى و ايه اللى ممكن يبسطنى ) ؟ 

و قتها هتعرف إذ كانت السعادة قرار ... ولا من البدايه كانت ساكنه جواك ؟ .

دمتم بخير و فى كامل السعادة و السكينه النفسيه .