فن إتخاذ القرار  

" حكايه الراجل اللى وقف قدام الشجرة "

كان فى راجل زمان ماشى طريق طويل ، لحد ما وصل لشجرة ضخمة واقفة قدام مفترق طرق . 

واحدة من فروع الشجرة كانت بتميل ناحية طريق سهل و مستقيم لكن طويل جدا ... 

و الفرع التانى بيشاور على طريق متكسر و متعرج و مليان مطبات !! 

هنا الراجل قعد و حط إيدة على خدة و دخل فى دوامة تفكير عميق أخدت منه اليوم بأكمله و هنا جه وقت "قرار الوقت" بأن الليل دخل عليه و معرفش لسه ياخد اى طريق منهم .!! 

لحد هنا حكايتى خلصت و لكن تعالوا نتأمل شويه و نتكلم عن " ليه بنخاف ناخد قرار ف حياتنا " ؟؟

بمعنى أسهل أن فكرة إتخاذ القرار بيولد جوانا بعض مشاعر الخوف و القلق تحت مسمى " هو أنا هقدر أكمل الطريق دة للنهاية " ؟ طيب يا ترى ممكن أفشل ؟

طيب لو أخدت القرار و للاسف كان غلط أية رد فعل الناس المحيطين بيا ؟

طيب مش يمكن أندم ؟؟ 

و ناهيك من الأسئلة الوجوديه اللى مغذاها الأساسي هو الخوف ! 

بصراحة فى ٣ أنواع من الشخصيات اللى قابلتها ف حياتى ليها طريقتها فى إتخاذ قرارها و هما ...

• اللى بياخد القرار بسرعة من غير دراسه لأنه خايف من خسارة الشئ اللى قرر علشانه و بيستعجل ف قرارة من غير دراسه واضحة للنتائج .

 • فى كمان نوعيه بتخاف من

 " الإختيار" لأنه بالنسبالها مفترق طرق صعب جداً و بتحتاج لشخص مساعد ليها أو بمعنى أدق شخص بديل ياخد عنها القرار .

• و فى البطئ جداً من شدة خوفه ف بيأجل كل ساعة و كل يوم إنه ياخد قراره ، لحد ما الفرصة تضيع منه .

و ما بين { خايف و قلقان ، بطئ و سريع ، محتاج بديل أو عنيد و متهور } ... بنفتقد ل 

" فن إتخاذ القرار " 

تعالوا كدة ناخد شويه طرق أتمنى إنها تكون سهله و تساعدنا كلنا على 

" إتخاذ قرار صحيح من غير أى مخاوف أو هواجس ترعبنا " 

+ أولاً .. و هى قاعدة الدقيقة الواحدة ٦٠ ثانيه ، و دى هتسأل نفسك فيها سؤال مهم جداً و هو ( أنا عايز إيه بالظبط) ؟ و تأكد أن أول إجابة هتيجى ف بالك هتكون هى حقيقة إحتياجك .

+ ثانياً و هى قاعدة كتابه القرار على طريق سيناريوهين مكونين من ( أ - ب ) و تخيل كل سيناريو ف إتخاذ قرارك هتتصرف فيه إزاى .

• ثالثاً .. وهى قاعدة ( ١٠/١٠/١٠ ) بمعنى أسأل نفسك القرار دة هيأثر عليا بعد ( ١٠ قايق) ولا ( ١٠ أيام) ولا ( ١٠ سنين ) علشان تساعد نفسك فى إتخاذ القرارات قصيرة المدى و بعيدة المدى كمان .

رابعاً .. كلم خوفك و كأنه إنسان بدل ما تهرب منه ، و أسأل نفسك إيه الطريق الصحيح لاتخاذ قرارك بطريقة ناجحة ، و من غير عوائق .

الخلاصة ...

ـ أتعلم تعافر ف الدنيا و أوعى تخاف ،، لأن دنيتك أنت البطل الوحيد فيها و إنت بس قارد على صناعة قرارك .

ـ اوعى تخاف من الفشل .. لأن الفشل و النجاح متلازمين فى كل مجالات حياتك طول ما أنت عايش .

ـ أهزم خوفك من فكرة إتخاذ القرار بدراسه كافة الطرق اللى هتنجح فيها لإتخاذ كل قرار ناجح ف حياتك .

دمت عزيزى القارئ فى ملئ السعادة