القلق من المشاعر الطبيعة اللى بتتولد و بتكبر كل ما إحنا كمان بنكبر .
بدايه من خوف الرضيع وقت ما بتتأخر الأم عن إرضاعة ، و بتكون طريقته الوحيد عن التعبير عن مشاعر القلق اللى جواه هى البكاء و الصراخ .
مروراً بجميع مراحل حياتنا من مراهقة و شباب و حتى مرحله الشيخوخة ، و دة لأن لكل مرحله من مراحل حياتنا ليها قلقها الخاص بيها ، و ليها اسلوب تفكيرها المختلف عن المرحله السابقة لحياته .
و من نظرتى المتواضعة احب اقولكم أن للقلق ف نظرى تلات مناطق .
١_ أولها و هى ( المنطقة الرماديه ) و دى كتير مننا عايش فيها ، وهى فى واقعها شخص قدر يتعايش مع القلق اللى جواه و قرر كمان يصادقه و يصاحبه ، و يرميه ورا ضهره
٢ـ و فى منطقة تانى وهى ( الانتصار )
دة بقى هو الشخص اللى قدر بكل قوته ينتصر على جميع مخاوفه و يحول القلق لطايره ورق رمى عليها كل أحمال القلق و الخوف اللى ساكن قلبه و عقله و طارت لأبعد مكان و قدر يعيش حياته بكل أريحية و سط إشراق الحياه و شايف منها بس الجانب المبهر و الممتع .
٣ـ المنطقة دى هى الاصعب و هى ( الإستسلام )
دى اللى فيها الشخص للأسف قرر الاستسلام بشدة و ساب القلق ينهش روحه و لسه بيخاف من الاوضة الضلمة ويا النور المطفى و بالنسباله الليل دة هو الكارثة العظمى اللى عرفتها البشرية ، و أنه ( الشبح المستخبى ) وراء الستارة اللى هيظهر فجأة و هو نايم ... دة لو عرف ينام أصلا !!
و السبب هو التفكير الزائد و الرعب المستمر جواه .
• قلق من الحاضر
• قلق من المستقبل
• قلق حتى من كل نفس بيتنفسه .
و مع الوقت القلق و الهواجس دى بتتحول لأمراض و شكاوى جسديه .
ولأن المكان المفضل لمشاعر القلق هو ( العقل عن طريق إرهاق ذهنى رهيب ليل و نهار و دة المسبب الأساسى للصداع المزمن ) و ( المعدة عن طريق إضطرابات مزمنه ف القولون و الجهاز الهضمي ) بتبدأ الحياة بالتعقيد و السوداديه .
طيب هو إحنا هنفضل عايشين كدة ؟؟
اكيد لأ طبعا ...
• من أعظم الطرق الحقيقية للقضاء على القلق هى ( مواجهته ثم مواجهته ) و بقوة مش الهروب منه أبداً .
• ترتيب أفكارك ، بدءاً بالاكتر أهميه للأقل منها .
• طلب المساعدة من شخص أو إتنين بالكتير لمساعدتك فى تخطى مراحل القلق الشديد و مساعدتك فى ترتيب أفكارك ...
و أنا هنا بقول تطلب مساعدة من شخص أو إتنين دة علشان متتحولش لطاقة سلبيه من كتر الشكوى من القلق اللى بتعيش كل تفاصيله للآخرين أو تكون ف نظرهم بتلعب دور الضحية ف الطبيعى أن النتيجة هتكون أن أغلب المحيطين بيك هبيدأوا ف الهروب و النفور منك و من التعامل معاك .
• هات ورقة و قلم و اكتب كل مخاوفك و شعور حسيت بيه وأنت قلقان ، و أسأل نفسك سؤال مهم ( هيحصل ايه لو اللى خايف منه حصل ؟؟ )
و هنا احب اقولك إنك دخلت ف اول مرحله للقضاء على القلق اللى جواك و هى إنك بدأت بمواجهته بكل ثقة .
• انزل امشي لأن حقيقي رياضه المشى مهمة جدا لانها بتلعب على كيما المخ و معالجتها و هتقدر وقتها ترتب أفكارك و أولوياتك ، من غير معاناه .
• قرر تشوف و تتعامل مع القلق إنه مجرد سراب و مع الوقت مصيره يتبخر و ينتهى من حياتك .
• و الاهم إنك تفتكر و تتأكد أن ليك رب بيقول ( كن فيكون ) ف أرمى كل أحمالك و مخاوفك و ثق و أتأكد أنه أقوى من أى قلق .
دمتم بخير و فى كامل الهدوء النفسى .
2
-2
