بجد هم كبير الانتماء للبشر

اتعودت زمان أكون فخورة بجنسيتي و جنسي 

لما كبرت شوية فقدت الاحساس ده بالفخر لأن جنسيتي مليش فضل فيها و لا كمان جنسي و لأن اللي بيشاركوني في الحاجتين دول الانتماء ليهم مش مشرف بالمرة في معظم الأوقات .

بالتدريج مبقاش عندي شئ أقدر أفتخر بيه - لانه الشئ الوحيد اللي بجد ملكي - غير شخصي أنا لوحدي ككائن بيحاول يبقى كائن صالح و بيتحلى بقيم انسانية.

اتعودت ألاحظ تصرفات البشر و من خلال العادة دي لقيت ان الأناسي أكثر الكائنات قدرة على الايذاء و التدمير و التخريب 

و شكل الكورة الأرضية حالياً يشهد لهم بكده بامتياز 

الكائنات الوحيدة اللي بتقتل بني جنسها مش لأنها جعانة أو محتاجة - و ده شئ ممكن أتفهمه و ان كنت مش بحترمه - لأ عادي 

القتل ممكن علشان يزود مكتسباته أو يسرق زوجة زميل له في الآدمية أو حتى لأنه متنرفز و بس !

ده طبعاً غير استعباده لبقية الكائنات و تندميره لبيئتها الطبيعية و بيئته و سلبه لحريتها