" البوست "جد على هزار"

 البوست ده عن كيفية معاملة الرجل الصايم بسلامته "المصري المعروف بجبروته"

اولا الرجل المصري كائن بسيط جدا جدا واحتياجاته بسيطة لكن بقليل من التأمل هتكتشفي عزيزتي المرأة إن الشاطرة هي اللي تعرف "تروض" تلك الاحتياجات وتفك الطلسم، صبرك بالله متتعصبيش انا عارفة انك انت كمان عندك نفس احتياجاته، ارجعي للبوست السابق وانت تهدي.

شوفي يا ستي هو صايم، صايم عن السجاير وصايم عن الأكل وعن كل المتع اللي يقدسها وبيترجمها على انها "حياته"

ده اولا ف لازم تراعي الموضوع ده لأنه معقد جدا بالنسبة لشخصية مش عاوزة حاجة غير تاكل لقمة عدلة وتقعد في امان الله على الكنبة بعد يوم شاق جدا شاف فيه جميع انواع الرذالة سواء في الشغل من مدير معقد مثير للإحباط او في الشارع وهو بيقابل سيرك ولاد الحلو بكل تفاصيله وشقلباظاته وهو طبعا صايم مش عارف يشتم ولا "يفلفص" وسواء راكب عربيته أو مواصلة فهو من أولي العزم."بجد مش هزار"

طبعا هو أول ما يدخل البيت مش محتاج غير ابتسامة وطبطبة خفيفة على كتفه اللي هو "قلبي معاك والله يابني" وصمت تااام سيبيه شوية لحد ما يستوعب إنه وصل لبر الامان، لازم يشعر ان بيته هو المكان الوحيد اللي بيشعر فيه بآدميته "حقيقي"

هيدخل ينام شوية سيبيه ينام، نومه عبادة يا بنتي والله، لأنه بيكف عنك اذى العيال لما تقوليلهم هششششش بابا نايم "مشيها اذى العيال"

لما يصحى حاولي تفخمي وتعظمي في دوره ومتاعبه واهم حاجة وده بجد مش هزار لازم يشعر إنه ملاذ لك زي ما أنت ملاذ له.

طبعا انت عندك نفس الاحتياجات بالضبط لكن ربنا خلقنا نفسنا أطول علشان منتهورش ونقوم نخلص عليهم زي ما ستات كتير عملوها في زماننا هذا، لما فاض بهن

. فإذن خليكي هادية جدااا لأنك بتقدري تصبري على احتياجاتك وتغليب مصلحة البيت اكتر من الرجل عموما.

انت محتاجة كلمتين حلوين عن شكلك وبارفانك وهو كمان لازم تتغزلي في شكله وهو راجع من شغله منهك انما وسيم مرهق انما مسمسم، مهروس انما جميل وطعم، حتى لو "باردون يعني" اصلع أو بكرش" لأن شعره وقع من الشقا وكرشه طلع بسبب أكلك الدسم يا مون شيري، فهو يستحق يعرف انه فعنيكي احلى من أحمد عز ف الاعلان بتاع الكومباوند اياه وإياك ثم اياك تتغزلي في احمد عز او اسر ياسين، لأنه فعلا احسن منهم على الأقل معترف بولاده.

 وكمان يحب جدا شعوره بالجدارة إنه جدير بحبك باحترامك بالدلع، خصوصا وهو صايم، وف زماننا ده ممكن ميكونش لاقي نفسه في شغله فلازم يلاقي نفسه في بيته، ف عنيكي، ف البلاي ستيشن، ف الطاولة على القهوة، لازم يحس إنه كسب السباق اي سباق يا مدام بالله عليك.

يعني يا سلام لو كان تعب وطلعت عينه لحد ما كلمك واتعرف عليكي واكتشف انك كنت مغرورة وعايشة الدور ومش سهل حد يملى عنيكي وااااو إحساسه بالانتصار والقنص والصيد والفريسة ده جين في جيناته من ايام ما كان في الكهف وبيطلع على الشجرة وبيكتب على الحجر، ساعتها طبعا هتفضلي مهما الزمن عدى اعظم انتصاراته ويا ريت تكوني كده فعلا بذكائك.

فيه راجل سعادته انك تقولي له حاضر, بس كده، إذن قبل الفطار قولي حاضر مبدئيا وبعد الفطار هاتيه على مهلك وبالراحة وخليه يقرر قرارك بدون ما يشعر ويفضل حاسس إنك سمعتي كلامه وقلت حاضر، 

بس خلي بالك مش طول الوقت حاضر، اي جرعة زايدة من الحاجات دي بتقلب بشكل عكسي وبنضطر نعالجه عند دكتور نفسي او يمرضك انت شخصيا وندور لك على دكتور يعالجك، صحصحي معايا

الراجل بعد الفطار بيحاول يصمد لحد التراويح، دعيه يصمد وحسسيه انك بتستمدي منه الجلد والحماية والأمان والإيمان، اه والله ده بيعطي له شعور عظيم لما يشعر انه امانك وحمايتك "هو لازم يكون كده فعلا على فكرة"

طيب لو زوجك او خطيبك او حبيبك الصايم ده رجل مثقف يحب الست الذكية اللي بتستمع باهتمام يبقى حضرتك تسيبي خالص مسلسل جعفر العمدة لأنه شخصية توكسيك مقرفة، وتجيبي طبق قطايف وكوباية شاي بنعناع او فنجان قهوة وتفتحي مع جوزك موضوع ف مجال هو بيحبه، سياسة بقى فن أدب كورة، وتجرجريه ف الكلام وتسيبيه يحكي ويسهب في اي حاجة بيحبها وتستمعي بجد ولو متعرفيش حاجة اسأليه ده بيزود سعادته بيحسسه انك مش مدعية وانك فعلا بتشاركيه اهتماماته مش بتمثلي وياريتك تكوني مثقفة بجد، هتعطي له سعادة مضاعفة. حاولى تقرئي الثقافة بتديكي بعد خيالي وقيمة مضاعفة وفعلا شخصيتك بتختلف في كل حاجة.

وأخيرا يا صديقتي محدش هيعرف يمنحه كل الحاجات دي غيرك انت زي ما قلت في مقالي السابق للرجل ان محدش هيعرف يمنح الست كل احتياجاتها كامرأة مصرية عاملة وصايمة وبتطبخ لقبيلة ويحتويها ويحاول لا يثير غضبها ويروضها الا سيادته

ملحوظة : شكرا للناس اللي طلبوا مني هذا البوست على وجه السرعة وانا والله كتبته بسعادة واتمنى بجد اني اكون قدرت افض الاشتباك في البيوت المصرية في شهر الصيام، كل سنة وحضراتكم بخير وستر وسط.حبايبكم

دينا عاصم 

دينا سعيد عاصم