والدي الضابط المهندس المحامي .. المبدأ

والدي الله يرحمه كان ضابط جيش، وأحد مؤسسي الدفاع الجوي في الجيش المصري، حطوه في المكان ده لأنه كان نابغة في الهندسة. 

أحمد الدواخلي كان حلمه يدخل هندسة، لكن لأنه يتيم عمه حكم أنه يدخل حربية، لأنه خد ثانوية عامة سنة 52، فبقى واجب عائلي - في نظر عمه - أن يبقى من العائلة ضابط جيش

مشكلته في الجيش كانت أنه بطبيعة شخصيته بيناقش الأخطاء، لحد ما يصل للصح.. غالبا الناس الشاطرة في الرياضيات كده، سيستم حياتهم كله بما أن/ إذن

وذات مرة، أحد زملائه مثل أمام محكمة عسكرية بسبب مسألة ما في شغلهم، ووالدي بحكم صداقتهم حضر الجلسة معاه. ما عجبوش المرافعة بتاعة محامي زميله، وكان واضح أن الحكم هيكون ضد صديقه، فطلب الكلمة أمام القاضي، فلما سمح له القاضي بالكلام، حط الموضوع كله بصورة (( بما أن / إذن))

صديقه اتحكم له بالبراءة، والمحامي بتاعه انسحب في صمت، ومرت سنين..

ولطبيعة والدي المصرة على عدم استصغار نفسه أمام قياداته طالما عارف أنه صح، ما استمرش في الحياة العسكرية اللي من الأول لم تكن مناسبة له، حيث طاعة القيادات أساس وبديهيات وإلا المنظومة لا تقوم لها قائمة.

لما تقاعد، صديقه صاحب القضية فضل وراه يقنعه أن سكته المستقبلية المحاماه مش الهندسة، وفعلا درس حقوق، وفتح مكتبه، وكان من أشهر المحامين في عصره، ومرافعاته كانت دايما زي الهندسة بما أن / إذن.. ويمكن من أشهر القضايا اللي رفعها إلغاء استثناءات المجموع في القبول بالجامعات، واللي كانت بتوصل الفئات المستثناه لدخول الطب ب 52%

ايه الخلاصة؟

عايز هندسة/ دخل حربية/ استقر في المحاماة

يعني عايزة أقول ما تزعلش على حاجة، في حاجات كتير بتتغير ومكتوبة لك، وبمناسبة ثانوية عامة وكده؟

الحقيقة لأ.. عايزة أقول أن والدي تقاعد من المحاماة كمان وهو على قمة ساحاتها، وتفرغ لاستصلاح قطعة أرض

عايزة أقول الراجل عاش تعبان في كل مجال دخله

اللي عايز يرتاح ده شخص حالم جدا أو شخص حلنجي مش عايش الحياة بجدية ومش ملتزم بتخطيطات الصح والغلط.. 

مافيش راحة.. الراحة اختراع لم نعرفه بعد

الراحة اللي بجد، الدواخلي كان بيلاقيها بس يوم ما يفك كرب حد، سواء بحل مشكلته أو بمساعدته ماديا، الله يرحمه كان دايما يقول لنا دي مش فلوسي، المال مال الله احنا بس مستخلفين فيه

كان اللي يشوفه يفتكره مليونير، والمسألة كلها في الحقيقة أن دي مش زيادة عن حاجة بيته، لأ عادي يديها لحد محتاج وييجي على بيته، وللا حتى يستلف ويفك ضيقة حد، ويقول أنا هعرف أسدد لكن هو مش هيعرف.. 

الله يرحمك يا دواخلي، علمتنا كتير قوي، يا مين يقدر يبقى نقطة من بحرك

#يعيش_المعلم_ويتعلم

#جدًا

#بنتكلم_عن_ايه

#حياة