زلط الحبيب

وجود حد بيحبك في الدنيا كفيل أنه يعودك البهجة والأمان، يخليك تحب الدنيا وتحافظ على كل حاجة جميلة مهما كانت بسيطة، كفيل يحلي الجو والكلام ويزيدك حب لنفسك وثقة فيها، يعملك نوع من الاستغناء عن حاجات كتير وناس كتير كنت بتمارس الحياة معاهم كنوع من تضييع الوقت عشان متركزش في وحدتك ووجعك. لما ربنا يرزقك بحد كدة ياريت تحافظ عليه، وتتخلى عن المشاعر السلبية اللي ولدتها الوحدة والناس اللي بتكره نفسها، والحاقدة والتايهة، والمتسلقة والمعقدة واللي شايفة الحياة بنظارة سوداء لما ربنا يرزقك بيه أعرف أنك من القلائل اللي اصطفاهم ربنا في الأرزاق، مش عشان معاك شخص محصلش لا، ده ممكن يكون فيه عيوب كتيرة لكن عشان معاك شخص اعتبرك انت العالم كله اللي بيشوف وبيتعامل وبيفكر وبيحس من خلاله، واللي بيرتب كل حياته عليه، واللي لا يمكن يكون قاصد في يوم أنه يخنقك أو يزعلك أو يحيرك، واللي نفسه يجمعلك نجوم السما ويرميها في حجرك. لما تلاقيه ... انسى كل المقاييس اللي اتعاملت بيها مع الناس قبله ، واتعامل بمقياس مختلف خالص، مقياس الثقة والمحبة والتفاني. مش مقاييس الندية والمقصود والمعاني اللي ورا الكلام وتأويل التصرفات كل الهري ده قالوه زمان في جملة (حبيبك يبلعلك الزلط) بيبلع الزلط لانه عارف أنه عمره ما هيتأذي من زلط حد بيحبه #ستوب_كادر