لما الاستمرارية بتدل على نجاح، اذاً الطلاق بالمنطق كده طبعاً فشل. بس في وجهة نظر تانية بتقولك لو انت سيبت مكان و اشتغلت في مكان تاني بنفس البوزيشن، فاستمراريتك هنا في البوزيشن مش في المكان.

يعني لو انت دكتور و سيبت المستشفى دي و اشتغلت في واحدة تانية، تظل دكتور يا حبيبي منقصش منك حاجة بالعكس زاد. طيب لو انت دكتور و قررت تسيب الطب و تشتغل في الفن، انت حر على فكرة مينفعش حد يعتبر ده فشل.

طب لو انت دكتور و اشتغلت في الفن الى جانب مهنتك كدكتور، انت حر بردو. الموضوع خاضع للفروق الفردية تماماً، و النجاح و الفشل أمر نسبي تماما.

فالاستمرارية الوحيدة اللي نقدر نقيس عليها هي استمرارية السعي. ببساطة فطالما اتطلقتي و لكنك مستمرة في ال Dating، تبقى مش معقدة خالص بالعكس ست رايقة تماماً و مدخلتيش في الحفرة بتاعت "كل الرجالة وحشين" و الجو ده.

طب يا آيه هنفضل ننزل Dates كده بدون إرتباط مستمر! ما ده بردو يعتبر فشل. طيب حبيبتي سوق العلاقات بيتغير كتغير اي سوق في الدنيا، بل و فيه Trends زي زمان كانوا دايماً يضربوا المثل بالجواز من ظابط و طيار، و التريند ده عفى عليه الزمن و بقى الشوجر دادي دلوقتي هو التارجت.

فانتي بتتغيري، و السوق بيتغير، و احتياجاتك بتتغير. لما تستقري من جواكي هيبقى سهل تستقري في علاقة ان رغبتي في اقامة علاقة، لو مش راغبة؟ محدش له عندك حاجة حبيبتي. ياما ستات عاشوا و ماتوا ستات بيوت و سناجل عادي.

احنا مش في سباق لا في الشغل ولا العلاقات، فلوسك حاضرة و عايشة مستورة محدش بيضغط عليكي نتيجة احتياج، فخلصت خلاص.

طب ايه الدافع اللي يشجعني ابدأ من تاني او ادخل العلاقة دي من الأساس؟ الدافع ببساطة هو انك تعيشي الحياة بحلوها بمرها. انما هتفضلي في الحلو بس! هتملي و تزهقي.

المسؤولية بتدي زوايا تانية للحياة، بدل ما تفضلي عايشة على الهامش.

افهم من كلامك ان الجواز بالضرورة هيخلي حياتي أصعب؟ اه طبعاً 😅. انتي لما تشيلي نفسك و تديها كل الحب و الوقت و المجهود، غير لما تقسمي مشاعرك على كذا حد. بس الجميل ان الحب هيتضاعف بقسمته.

يعني ايه الكلام ده؟ يعني ببساطة انتي ممكن تعيشي لنفسك فتهتمي بضوافرك و شعرك و بشرتك و لبسك و بيتك و أكلك. او تعيشي لأسرة كاملة و تعملي الحجات دي لناس كتير. آه مش هيبقى نفس التركيز بتاعك على نفسك و لكن المشاعر زادت حواليكي.

بس خدي بالك من حاجة بردو، ان بزيادة الافراد و زيادة المشاعر هتزيد الدراما بالضرورة. فلو انتي مبتحبيش الدراما، فكك من الجواز، هتزهقي جامد.