مين أستاذ أيمن أخبارك يا أديب يارب تكون بخير.

الحمد لله يا حمادة طمنا عنك يارب تكون انت والأهل بخير.

الحمد لله بخير، بس إيه يا عم الكلام الحلو اللي بتكتبه على صفحتك.

هو انت بتقرا اللي بكتبه يا حمادة!

أه وكمان بشوف التكريمات والصور الحلوة وكل حاجه بتنزلها.

كل حاجة كل حاجة يا حمادة؟

طبعًا طبعًا يا أستاذ ومش بفوت ولا كلمة، دا حتى صفحتك طقس يومي بالنسبالي والله. 

هو انت يا حمادة صديق عندي ع الصفحة؟!

أه وربنا وكمان من سبع سنين ومش بفوت قصة ولا مقالة ولا خاطرة بتكتبها.

أومال يا حمادة عمري ما شفتلك لايك ولا كومنت على أي حاجة بنزلها، لعله خير!

ليه هو انت متعرفش يا أستاذ؟

لا والله يا حبيبي معرفش، هو في حاجة؟

يعني بجد مقلتلكش؟

وجميع الأيمانات ما قلتلي ولا أعرف. 

لا أصل أنا وبصراحة بتكسف أوي أوي يا أستاذ علشان كده مبحبش أعلق ولا أظهر وبتابع في صمت. 

لا يا راجل! بتتكسف أوي أوي على أساس إنك داخل شقة مشبوهه مثلًا ولا داخل عندي "إعارة"!

لا والله مش كده ولا دا قصدي أبدًا بس أنا يعني زي ما قلت لحضرتك خجول شوية.

خجول بمعنى إيه يا بني؟ هو أنا بقدم محتوى +18 مثلًا أو بنزل صور مش ولابد؟

لا لا العفو يا أستاذ دا حتى انت كلامك كله حكم وبيدخل القلب علطول وكأنك بتتكلم عننا.

طيب يا سيدي الحمد لله، بس يعني شوية تقدير، يعنى لو خايف تستهوى حط التعليق بين قوسين أو حتى لايك بس، وأكيد مش هتتقفش عندي يعني أو حد هيعايرك، ولا من شدة خجلك وكسوفك مش بتحب لايكاتك وكومنتاتك تتكشف على أغراب؟ على العموم يا سيدي سعيد إني قابلتك وكويس إنك عرفتي أنك عندي علشان أدور عليك وأحطك جوه القايمة.

أي قايمة يا أستاذ؟

لا لا ولا حاجة متشغلش بالك إنت دي قايمة عملتها جديد للناس الرهيفة الحساسة اللي بتتكسف وإن شاء الله تنورها قريب وتعجبك الإقامة فيها.

ملاحظة: أي تشابه بالأسماء غير مقصود بس القافية حكمت وأي "حمادة" عندي ع الصفحة ارفعله القبعة.