رجع الشتا ونِزل المطر 

لمّا بكت عين السما

فاضت علينا بدمعها

وغرّقت ورق الشجر

الشجر ..

لمحني جنبه،

وأنا وحدي ماشي

ف سألني فينهم ؟

قولت مين ؟

قالي حبايبك

اللي قلوبهم من حجر؟!

سكتت عيوني عن الكلام

بعد ما جفت من البكا 

ومن السهر

أوم قولت له :

طب ليه بتسأل عن حبايبي؟

ما أنت فرعك شايفه فاضي

خِسرت أوراقك يا صاحبي

زي حال كل البشر!!

قالي عادي

بكره هيرجع تاني غيرهم

وتشوف فروعي منورة

ده يا بخت مين عدا وصبر

قولت أقولك ..

خلي المطر يغسل قلوبنا 

من الوجع

ويعدي ع الغايبين يسلم

من غير كلام ولا ملام

يملا كاسات الذكريات

بكل حلو ما بينّا كان

ويكتب عليها ..

ياللي حرمتونا الوِداد 

    بحُكمكم

حرّم عليكم حُبنا 

   حُكم القدر