قلمي .. وأنا

الأوله أه ..

كان قلمي عود أخضر

طارحه على غصونه البراءه

وكان حرفه بينور

مابين صراحته والجراءه

بينادي على رفقه وصحاب

ف زمن التفاهه والغرابه

الثانيه أااه ..

لما بقلبي ف يوم 

أنا اخترت الصديق

باعني وكنا وقتها

ف نص الطريق

قوم قلمي جفت كلمته 

ودموعي لم جفت ع العشره

 أقصد .. على الكذبه

اللي بغشمي ياعيني أنا صدقتها

لما حسيته أماني وسكتي

ف قلب محنة ووقت ضيق

والثالثه آاااه ..

قلمي صبح بين يوم وليله 

سلاح سفاح 

بيذبح القلب اللي مطعون

 وبات مليان جراح 

وبيصفي من جواه 

كل شيء صافي وبريء

وبيقتل الحلم

اللي عاش صابر جريء

سألته : ليه ؟؟

يا قلمي ليه ؟

بتظلمني ليه ؟

قالي : 

لازم اعلِم عليك واعلمك 

وبكل جبروتي راح اشمت 

لكني غرضي افهمك 

واسمح لي برضه :

هأخرك و ارجعك 

وانورك وابصرك 

وضرروري تاني 

هرجعك وهقدمك 

ف تقف بقوة 

وتفوق بقا بحق و حقيق

يلا بقا صحصح معايا

واركب ودوس

واوعاك تصدق أو تسامح

وتدي فرصه لسيفي تاني يوجعك

ده اسم الله جرحك 

كان حياله امبارح

هو انت ايه

مش بتزهق م الدروس؟؟

بلاش تصدق من يوهمك 

إنك طبيبه

أو أن عمره ماراح يفارقك 

لو تسيبه

اوعاك لقلبك تنحني

وتهد روحك 

ومعاك ف لحظة تهدني

وتنسى جروحك

وتقعد تهرتل ف الكلام

وتقولي بوحك 

خليك لوحدك ويا مني 

واسمع يا صاحبي

صدقني أنا 

انا وأنت لازم نتبني

أنا وأنت لازم نتبني