= هو الحب قرار وللا مشاعر ؟ 

- مشاعر 

= و المشاعر لك عليها سلطان ولا بتاعت ربنا ؟ 

- بتاعت ربنا 

= يعني متقدرش تتحكم في الشعور ؟ 

- لأ 

= طب بس بالطريقة دي حياتك هتبقى مليانة مصايب لو فضلت ماشي ورا مشاعرك 

- و أمشي وراها ليه ؟ منا انسان حر الارادة ممكن امشي وراها و ممكن اختار ان لأ ! كل الفكرة ان المشاعر مقدرش اتحكم فيها 

فعادي اوقات كتير بنحب ناس و منعملش بعدها قرارات ولا بناخد أكشن 

مبقولش ان ده صحيح ولا غلط كل واحد و ظروفه ! انما الشعور نفسه مقدرش أنكره أو أخفيه لأنه حقيقة مطلقة 

= صحيح مراية الحب عامية ! 

- لأ ده حضرتك اللي أعمى يمكن ! الحب بيفتح عيونك و بيخليك تشوف الحقيقة الكاملة 

الحب من أسمى المشاعر اللي اتخلقت فينا كإنسان 

و المحبة في حد ذاتها هدف لناس كتير ممكن تفضل عايشة بالشعور ده كفاية تماماً و مجردة نفسها من كل التفاصيل الدنيوية …. 

مبقولش بردو ان ده صح … و لكن الحب كشعور نعمة 

= و افرض بقى اللي حبيته ده انسان وحش ؟ 

- نفرض ليه يا سيدي هو انسان وحش بالفعل ! لكن ربنا رزقه حبي له … فين المشكلة ؟ 

= لازم تغيره 

- أتمناله الخير و أتمنى يتغير للأفضل طبعاً 

بس حضرتك أكيد كبير و ناضج و عارف و فاهم ان محدش بيغير حد ! و اللي عايز يتغير بيتغير بقرار شخصي منه …. 

ف انا تمامي أنورله طريق او افتحله سكة او ادعيله …. و حرة تماماً اسيبه يلاقي هو الطريق ده بنفسه و اوفرله البيئة الصالحة ل ده مش أكتر ! 

اثناء ما ده بيحصل اصلاً بتكتشف ان اوقات كتير انت اللي كنت وحش 

عشان كده الحب رحلة شفاء للقلوب 

لأنك بتصلح فيها نفسك عشان تعرف تقيس اصلاً مين فيكوا الوحش و بناء على ايه وحش 

بتحاسب نفسك مليون مرة قبل ما تحاسب الطرف التاني و بتصلح جواك كتير جداً قبل ما تتوجه بنصيحة للطرف التاني و في الغالب تقبلك له المطلق هو اللي بيصلح منه و يغيره للأحسن 

ببساطة.