ياشمس ليه تنسي طريقي

وطول عمري ليكي صاحبتك

مش فاكره ليه صوت ضحكتي

كان صوتها يسبق ضحكتك

سيبتيني ليه وبعدتي عني

فين راح ودادك ومحبتك؟!

وده كله ليه؟ إكمني يعني

بعت قلبي وهجرت ويَّاه سكتك؟!

إياك تكوني هتغدري وتستندلي

وتقلدي طباع الخلايق

وتتنِّكي وتتمنظري وتتأمَّري

معدش يا أختي حد رايق

وحياة عنيكي الحُمر دُول

أنا طالبة منك رحمتك

وأنا راضية لو نورك أذاني

علِّميني وعلِّمي يا غالية حتى بقسوتك

ده أنا قلبي من وجعه ارتعش

محتاج لنظرة حنينة

من عتمته خاف واندهش

كوني أصيلة هويِّنه

يلا نعود

من غير شروط ولا بنود

وأنا أوعدك

أوضع لكل عزول حدود

وإنتي وأنا مع بعضنا

نرجع نغني بدون شرود

وارسم مع شعاعك طريق

مليان أمل من غير حدود

بس ارجعي وبلاش عناد

خلي إللي راح يرجع يعود