لما عميلة بتشرفني اصمملها فستان من أهم الأسئلة ال بسألها "هل هنجيب شنطة للفستان مخصوص ولا هنستعمل شنطة موجودة؟". الشنطة مهمة جدا في ال Total look، وممكن تبقى هي نقطة الجذب الاساسية وعنصر اساسي في التصميم..

الشنطة مهمة جدا، ولها تريندات لكل فصل زي اللبس بالظبط، وخدو بالكم الشنطة القديمة بتبان جدا. ممكن الشنطة لو قديمة تبوظ ال Look بتاعك. لو عاوزين تكونوا Trendy علطول اختارو الشنط الكلاسيك ببراند معروف او شنط ملهاش اسم معروف يكون لها تصميمات خاصة مش تصميم كوبي من براند. 

أفضل وأغلى شنطة في العالم هي Birkin Bag من Hermes.. شنطة حلم لاي سيدة غنية أو مشهورة. هي في رأيي شنطة رقم 1 في العالم علشان هي Legend بتعيش اطول وقت تريندي، بتخلي اي سيدة شايلاها واثقة من نفسها. 

شنطة لها قصة في تاريخ الأزياء.. اتسمت باسم الممثلة الانجليزية jane birkin. كانت مرة مسافره سنة 1984 في طيارة، وبالحظ قعدت جنب الملياردير الفرنسي Jean-Louis Dumas صاحب مجموعة Hermes الفرنسية. لما جت تشيل شنطتها من الطيارة، الشنطة اتفتحت وكل حاجتها وقعت، فضحك وقالها انتي محتاجة جيوب اكتر. قالت له لو انت ذكي كده اعملها لو تقدر.. بعد فترة دعاها وقدم لها الشنطة هدية.. شنطة لها تصميم فريد كبيرة ولها قفل.. وسماها باسمها واتشهرت في العالم كله.

لو اي نجمة عاوزه تشتري شنطة Birkin لازم تسجل اسمها في قايمة انتظار من 6 شهور لشوية سنين، علشان في الاخر تقدر تعمل مقابلة شخصية فيها اسئلة في اي موضوع، وممكن في الاخر ما يوافقوش او ممكن ما تخدش اللون ال طلبته.. في منها Limited Edition ناس بتنتظر استلامها 5 سنين.. شنطة بتاخد وقت اسبوع تقريبا في تصنيعها، معظم أجزاءها Hand made، كل شنطة بيتكتب عليها اسم ال صنعها ورقمها.. الوانها الاساسية اسود وازرق غامق وبني، وبيج، وكل فصل بيزودوا الالوان التريندي..  

اي سيدة مشهورة في العالم لازم يكون عندها Birkin Bag. أكتر واحدة بتحبها Victoria Beckham عندها 100 منها، ومنهم Melania trump و Jennifer Lopez و Lady Gaga.. ودي صور للشنطة وهي في ايد نجمات العالم..

أتمنى كل السيدات تهتم بالشنط وخصوصا لما تيجي تعمل فستان تفكر هتلبسه مع اي شنطة..

بحبكم جدا. ❤