نوال: بتعملى إيه ياحبيبه أمك؟

مها: زى ما انتى شايفه بلم هدومى وراجعه لجوزى

- انتى يابت جرالك حاجة فى عقلك..ترجعيله بعد ما اتجوز عليكى ؟..لأ وإيه كمان هتجيبى ضرتك تعيش معاكى

- وماله..أحسن مايتخرب بيتى واتشرد بعيالى

- بت انتى ..انتى هتعمليهم علىَّ..دا انا عجناكى وخبزاكى..هو انتى فكرانى عماد هتضحكى علىَّ بكلمتين

- طاب اقفلى الباب وتعالى أقولك

- هاه..أدينى قفلته..إيه بقي؟ ..هتستسلمى بسهولة كده؟

- دا أنا هرجعله وأطلع عينه وعينها وأكرهه فى اليوم اللى شافها فيه

- أيوة كده..فرحينى وريحى قلبى..هى دى مها بنتى

- أنا بس راجعه علشان محدش يشمت فىَّ..وهو بقى هسويه على نار هادية

- جدعه يابت..وابقي طمنينى عليكى ياحبيبتى

- حاضر يا ماما..متخافيش علىَّ

وبعد قليل

عماد: احنا دلوقت بقينا كلنا فى مركب واحد،وأنا هنا الريس..انتوا سامعين..اااه

نسرين: على مهلك ياروحى..كنت هتُقع..لسه رجلك بتوجعك

مها(تهمس): طلعت روحك يابعيدة

عماد: أنا كنت بقول إيه؟

مها: كنت بتقول انك الريس

عماد: ايوة ايوة..بصوا بقي..حركات من بتاعت الأفلام دى ..مش عايز..واحدة تحط ملح زيادة للتانية فى الطبيخ واحدة تبوظ للتانية الغسيل وحركات الحريم الخايبة دى أنا مش عايز..انتوا فاهمين

مها: طيب..حاجة تانية يا..هههه..ياريس

نسرين: مفهوم ياقلبي

مها( تهمس): جاتك وجع فى قلبك

عماد: بصوا بقي عشان وجع الدماغ..انتوا تقسموا الطبيخ وكل واحدة ليها أيامها وتقسموا الغسيل كل واحدة تغسل هدومها.. وهدومى أنا تتقسم مابينكم والحمد لله كل واحدة عندها غسالتها

مها: وإيه كمان ياريس؟

عماد: اه.. كل واحدة تلزم اوضتها طالما مفيش مصلحة تقضيها وأنا هبات ٣ ايام هنا و٣ هنا والجمعة هنام ع الكنبة فى الصالة..يعنى كل حاجة هتبقي بالنص أما بقى بالنسبة لمصروف البيت هيتقسم برضه..التلت لنسرين والتلتين ل مها

نسرين: وليه بقى ان شاء الله ..هى مش كل حاجة بالنص؟

عماد: علشان هى معاها أولاد

مها: اه ياحبيبتى..انتى هتجيبى ام العيال ..للأرض البور اللى مبتخلفش

عماد: على فكرة يامها نسرين كانت مخلفة ولد من جوزها الأولانى..وبلاش التلقيح والكلام اللى مالوش لازمه ده

مها: طاب خلصت الخطبة بتاعتك ياريس وللا لسه؟ علشان عايزة أأكل البت وأنيمها

عماد: خلصت خلاص..روحوا بقى شوفوا وَرَاكم إيه؟

مها: إوعى كده ياختى عدينى..انتى واقفة فى الطريق كده ليه؟

نسرين: اااه..كده توقعينى

عماد: نسرين..سلامتك ياحبيبتى..هاتى إيدك

مها: سَمِى عليها ياخويا سَمِى..ههههه

وبعد قليل

مها: عماااااد...يا عمااااد

عماد: إيه فيه إيه؟

مها: إيه اللى جاب القطة دى هنا؟

عماد: دى...دى بتاعت نسرين

مها: انت مش عارف انى مبحبش القطط

نسرين: دى قطتى..ومحميها ومنضفاها ومش بستغنى عنها أبداً وميدو عارف

مها: مين ميدو دا ياختى..واحد جيبهولنا معاكى؟

نسرين: ميدووووو...عماد

عماد: إيه ده ..أنا ههههههه..حلوة ميدو دى

مها: دى لايمكن تقعد فى البيت ياسي...ياسي ميدو..أنا بقرف منهم

عماد: ماقالتلك انها منضفاها

مها: اه..زى مجبناكى ونضفناكى كده

عماد: مها..مش عايز غلط لو سمحتى

مها: أنا..أنا..عندى حساسية من القطط..حتى شوف ياعمدة ..بص بهرش ازاى ..شايف إيدى إحمرت ازاى ياعمدة؟

عماد: فين ده؟ أنا مش شايف حاجة خااالص

مها: عشان مبتشوفش

وبعد قليل

مها: إيه ده؟ انتوا لابسين وخارجين على فين كده ان شاء الله..على فين العزم

نسرين: فيه حاجة؟

مها: اه فيه..رايحين فين ع الصبح كده

عماد: دددد...دى نسرين هتشترى شوية حاجات كده

مها: حاجات إيه ان شاء الله؟

نسرين: وانتى مالك انتى ؟ حاجات خاصة

مها: يعنى إيه حاجات خاصة ياسي عماد؟

نسرين: يعنى مالكيش فيه وعن إذنك علشان مستعجلين..يللا ياميدو

عماد: مابلاش ميدو دى

مها: عمااااد..انت سايبنى ورايح فين؟ أنا بكلمك

عماد: أنا لسه متحركتش أهه..فيه إيه؟!

مها: لأ دورت وشك..يعنى كنت ناوى تمشي

عماد: عاوزة إيه يامها فى يومك اللى مش هيعدى ده..خلينا نخرج ونرجع قبل الحظر

مها: بقولك ايه وانا كمان عاوزة أخرج أجيب حاجات

عماد: طاب ماتخرجى وأنا ماسكك؟

مها: يابرودك يا أخى يعنى عاوزنى أجُر فى العيال ونخرج ونتشحطط فى المواصلات وحدنا وانت عندك عربية

عماد: أولاً دى مش بتاعتى ..دى عربية نسرين وهضطر استعملها مؤقتاً لحد ما أجيب واحدة

مها: بص بقي من غير رغى كتير أنا هدخل ألبس وأجهز العيال علشان ناخدهم ونجيبلهم لبس العيد

نسرين: انتى مش سمعتيه قال إيه وللا انطرشتى..بيقولك عربيتى وأنا بقي مش عاوزاكى تحطى رجلك فيها

مها: متنسيش بقي ياحبيبتى إنك قاعدة فى بيتى وأقدر أطردك منه

نسرين: عماد..انت سامعها وساكت

عماد: عيب يامها بكرة نخرج أنا وانتى

مها: لأ دلوقت

عماد: عشان خاطرى استنى لبكرة

نسرين: إنت بتتحايل عليها؟

عماد: معلش يانسرين خليها عليكى المرة دى

مها: انت بتراضيها بعد ماقالت عربيتى وعايرتنا

عماد: طاب اعمل إيه بس؟ خلاص محدش هيخرج خالص

نسرين: هو دا اللى ربنا قدرك عليه

عماد: بقولكم ايه..إولعوا انتوا الاتنين..أنا داخل أنام بلاقرف 

مها: عماااد ياعماااد

نسرين: كده ياعماد..طيييب

وقبل الافطار

عماد: يامهاااا..يانسرين..فين الفطار ..المغرب على آذان..انتوا يا اللى فى البيت..هاجروا دول وللا إيه

مها: إيه بتزعق ليه؟

عماد: فين الفطار؟!

مها: خلى الهانم تعملك

عماد: يانسرين ..نسرييين

نسرين: إيه مالك..فيه ايه؟

عماد: عاوز أفطر ..المغرب أذن

نسرين: خلى المدام تعملك

عماد: بقي كده..طيييب

نسرين: عماااد..انت رايح فين؟

مها: رايح فين دلوقت

عماد: رايح فى داهية..حسبي الله ونعم الوكيل فيكم

***يتبع***