ياللي عمرك اتسرق
بالدفاتر والورق
وشوية م الحبر الرخيص
سحبوا منك الحياة
قالوا شيبة وعيبة ياه
وماسابوا لأملك بصيص
أهجر من حكم عليك
بالنهاية وأنت حي
وأملى روحك نور وضي
مغتسل الحب بارد
أنزله و دور عليه
الشفا في حيضانه نايم
ضم نوره أدفى بيه
خلي جنبك صحبة حلوة
ناس لطاف بروح خفيفة
تبكي قهر و تشكي ليه
الحياة يا حبيبي رحلة
قضيها فرحة وطيبة
وأبعد عن عيون رذيلة
وعن كل الناس الكئيبة
سن قلبك هو فرحه
والشيبة نوره وكهاربه
ووسام قوة الاحتمال
سير بقوة وفوت وعدي
وعيش حياتك
طول ماربك لسه سايبك
عيش الحياة أكيد حلال

رانيا ثروت