أنا الدرويش وأنا الحضرة
و أنا الدايب فى النيران جمرة
وأنا اللى بقطع من لحم قلبى
لكلاب السكك ياكلوا
لجل ما يكونوا للجنة طريق
وأنا المريد وأنا الرفيق
وأنا الدمع فى العيون ساكن
وأنا حسن الصبية لما تقول الله
وتتبسم بسمة شفا متلهفة
وأنا اللى بتحرق بمليون قرار وقرار
لجل ما أنور للحيارى دروب
أنا المجذوب....
ومش عايز أفوق م الجذب
لأن فى كل لحظة حقيقة بتتولد
بتقتلنى ...تعجزنى
وما أملكش غير إنى أصرخ
بعزم الصمت فى كلامى
وأنا كاتم فى الضلوع غلبى
وأقول بكل وجع الكون
يا عالم كل ما بي
حبيبي يا رب

رانيا ثروت