عايزة اقولكم حاجة ردا ع الرسايل والتعليقات بتاعة "انا بقول الاوارد ومفيش حاجة بتحصل" الرسايل والتعليقات دي بتزعجني بشكل غير طبيعي لان فيها انعدام ادب يرعب مع ربنا .. بنتعامل معاه علي انه انا قدمتلك طلب فانت تستجيب وبسرعة !! 

الغريب انكم مش فاهمين اصلا يعني ايه ورد انتوا بتلاقوا الناس بتقول تجربتها فبتجربوا معاهم

الورد هو ايه او سورة معينة لها سر ربنا اختص بيه بعض عباده بطريقة او اخري وسيلة للدعاء مش اكتر بندعي ربنا مسلمين له بالنتيجة بعد ماجربنا كل طريقة تانية وفشلت لان مبئاش عندنا حيلة ولا باب غيره بنقرا باستسلام وتسليم له انه يدبرلنا الامر مش نشرط عليه

انا في ورد فضلت اقراه سنتين يوميا بلا انقطاع لدرجة اني نسيت كنت بقوله ليه ..حبيته وبقيت اقراه بلا هدف لحد ماربنا استجاب في اغرب توقيت ممكن واستجاب بكرم اكبر مما كان عقلي اصلا يصورلي ادعي بيه لنفسي ..والتوقيت لوحده فهمني انه كان انسب وقت لتحقق الامر مش الوقت اللي انا كنت منتظراه فيه

اتأدبوا مع ربنا وسلموله واحترموا الورد اللي بتقروه الورد له سر والسر في صاحب القلب السليم ..مش الفعل مش الكلمة مش العدد السر جواك تسلم وتستسلم ان في رب بيدبرلك الامر بحكمته ووقته وبيستجيب بطريقته واحيانا الاجابة بتكون بعدم تيسير الامر فحاولوا تفهموا ده ومتعترضوش علي قدره وتدبيره طالما طلبتوا مساعدته

#اوراد_رحاب