التراويح السهلة الجميلة ????

طبعا اللي ربنا يقدره ينزل جامع ويصلي ورا إمام بيقرا جزء كامل في عشرين ركعة يستغرقوا كدا ساعة ولا اتنين ربنا يقدره ويقويه

بس في التراويح مش لازم تصلي 20 ركعة ... ممكن 8 بس ولو تقدر تكتر كتير يا سيدي كتر خيرك .. مش لازم تقرا فيها الجزء بتاع اليوم ممكن تقرا قصار السور .. مثلا في أول ركعتين ممكن تقرا الكوثر والتكاثر.. الاتنين بحرف الثاء هايفكروك ببعض والاتنين قصيرين وكلنا حافظينهم من ابتدائي.. آدي ركعتين .. بعدهم ممكن تقرا القدر مع قريش الاتنين بحرف القاف وهيفكروك ببعض وحافظينهم من ابتدائي .. كدا كمان ركعتين .. عندك بقى الضحى والعصر دول بأسماء أوقات في اليوم وهيفكروك ببعض وقصرين وحافظينهم من كي جي .. ادي كدا 6 ركعات .. تاخد بقى المعوذتين في الركعتين الباقيين وكدا تمت التراويح .. بعدها تصلي ركعتين بس شفع ممكن تقرا فيهم أهم وأجمل آيات سورة البقرة اللي كلنا حافظينهم اللي هما آية الكرسي وآيتين الخواتيم اللي هما "آمن الرسول بما أنزل إليه من ربه... " وبعدها تختم بركعة وتر واحدة تقرا فيها أقصر وألطف سورة اللي هي الإخلاص "قل هو الله أحد... "

كدا ممكن كل ركعة تاخد منك دقيقة ونص ولا دقيقتين مثلا بقراءة متأنية وأداء خاشع .. يعني التراويح بالشفع والوتر ممكن يستغرقوا ربع ساعة أو تلت بالكتير قوي لو هترتل السور .. وطبعا بعد الركعات الأربعة الاولانيين تقدر تاخد راحة تشرب ميا ولا حاجة وتدعي دعوتين حلوين باللي في نفسك .. ماهي اصلا اسمها تراويح من فكرة ان صلاتها فيها راحة وتيسير 

بس كدا .. تقدر تصلي التراويح في بيتك بسهولة ويسر وتحافظ عالسنة النادرة الغالية دي .. وهاتكتشف انها سهلة جدا وجميلة خالص .. متاحة للكل ستات ورجالة حسب جهده وظروفه مافيهاش صعوبة ولا تعطيل ولا ضرورة بمكان معين أو قراءات بعينها

هاتكتشف إن مالهاش شروط تقريبا غير الخشوع والرغبة في التقرب من ربنا بسنة حبيبه وحبيبنا سيدنا شفيعنا نبينا محمد عليه أفضل صلاة وسلام.

التراويح حبيبة قلبي ❤