عقلية الصياد و مركزي الوعي و الضمير و غادة والي

بص يا ابنى..احنا طلعنا من الغابة بجسمنا..لكن عقلنا لسه شغال ب settings بتاعه الغابة..او ما يطلق عليها عقلية الصياد..اتطورنا حضاريا و علميا لكن مخنا لم يجارى تطورنا فى الكثير من الأحيان..

عقلية الصياد بتندفع وتنشغل بالخطر المباغت..السريع..فى حين درجة انتباهها بتكون أقل للخطر الساكن البعيد التدريجى حتى لو اكبر..أقولك ازاى:

10 ماتوا النهارده فى حادثة..مأساة

200 ماتوا النهارده بسبب التدخين و آثاره الجانبية..احصائيات

مخ الصياد بيتلعب عليه العاب كتير..منها خوفه المتواصل من نضوب الموارد..تيجى الاعلانات وتقولك خصم كبير و اشترى اتنين تاخد واحدة تالته هدية..تكون النتيجة انك تروح تشترى اتنين من حاجة انت مش محتاجها اصلا..بس (العرض المحدود) لعب على عقلية القنص والصيد عندك وخفت الموارد تنضب و رحت خطفت الاتنين من على الرف وعليهم التالته وانت مش محتاجهم اصلا..يا اهبل!!

طب حنفضل كدا كتير؟ مينفعش

لان(العالم الذى صنعناه اكثر تطورا من العقل الذى صنعه)

اصبح عندنا وسائل قتل اكبر واسرع..وسائل اتصال مش سايبه ثوابت (رغم ان الكتاب صدر فى اواخر التمانينات..لكن بيتكلم عن توجيه المجموع وتمرير الأفكار والتحكم فى العقل الجمعى والضمير والوعى العام كانه قاعد معانا)..مينفعش طريقة تلقينا للمعلومة وتحليلها والتعامل معاها تفضل بنفس الدرجة من التطور..لأازم بشكل ما نفهم طريقة عمل مخنا ووعينا عشان نقدر نتعامل مع العالم المعقد جدا اللى احنا صنعناه وفشلنا فى التطور لمواكبته.

تيجى بقى للذكاء الصناعي...و صيحة أحد أكبر مؤسسية بال(إبطاء قليلا) من تطوير التقنية عشان نفهم أبعادها وانعكاساتها قبل ما نطرحها للعامة...و عليهم خبر ايلون ماسك " دورت على مصدر له مش لاقيه مصدر صريح" أنه اتجوز من روبوتايه هو صنعها ونزل عليها السوفت وير اللى هو عايزه...

احنا الهابله اللى مسكوها طبلة..لا يستثنى من ذلك أشدنا ذكاء من ابسطنا... أو خلينا نقول زى عيل عنده اربع سنين لقى طبنجه ابوه فى الدرج وماشى يلوش...

هل تتوقع أن تقنيه مدام ماسك دى لو اتطرحت على الناس...حيطلبوا زوجة مثقفة موسوعيه رصينة؟ حيدخلوا فى أزمة جالاتيا وبيجماليون وكدا؟ نعم؟ انت متخيل حيبقى الوضع ايه؟ مش حاقول عشان انت معانا فى الفضاء السيبرانى فى العهد الكاردشيانى بقالك كتير واكيد عارف...

احنا داخلين على كل كوابيس افلام الخيال العلمي بتاعه التسعينات...من دلوقتي المراهقين والشباب محبوسين جوه شاشات موبايلات والعاب..ارتداد وتدنى للقدرات الذهنية و تشتيت بشع ... فاكر افلام آخر ولد وآخر بنت على الأرض وهما منعزلين عن بعض وبيلعبوا الكترونى مع رفاق افتراضيين وسايبين البشرية تنقرض ؟ فاكر فيلم her لما البطل وقع فى حب صوت شخصية افتراضية ؟ فاكر كل افلام تسلط الآله على الإنسان ؟ عارف ماتريكس؟ ايوه زى "نيو" و الكابل راشق فى قفاه...

وكما قالت اختى فى يوم عن ابنها وهو بيعمل حاجه غلط وعمال يقول لنفسه عيب " مركز الوعى فى مخه نما بشكل ممتاز..لكن مركز الضمير لا"

اهو احنا كدا بالضبط...