من ضمن مساوئ نصايح السوشيال ميديا عن العلاقات إنها خلقت حالة من الشعور بالاستحقاق المبالغ ...

يعني من نوعية النصايح زيي ان مسألش عليكي كل خمس دقايق يبقى مش بيحبك و مش مهتم بيكي و يعرف عشرة غيرك و انتي مش من أولوياته ... أو لو كل منك ورك الفرخة

يبقى كده طفس و أناني ... أو لو مدفعش فيكي دم قلبه و مشي هو حافي يبقى بخيل و هايبهدلك معاه ... أو لو مدخلش حرب أكتوبر و قتل و اتقتل عشان خاطرك ... يبقى مينفعش يكون مصدر أمانك و مش هايعرف يصونك و يحافظ عليكي ...

و انت متتجوزش اللي مش هاتشوف و لا تسمع و لا تثق و لا تتكلم و لا تتحرك و لا تتنفس الا لو انت راضي عنها ... و إلا تبقى زوجة ناشز و هاتدي عقلها لصاحبتها عطيات و هاتعمل زيي بنت عمتها توحيدة ... و متتجوزش ألا اللي بتركع لك ركعتين الصبح و تسبح بحمدك لحد ما ترجع من الشغل و تطوف حواليك و انت في البيت و إلا تبقى مظفرتش بالزوجة الصالحة اللي هاتحافظ على بيتها و تعرف تربى عيالها ... 

و متصاحبش اللي مش فاضيلك و عنده أولويات تانيه في حياته غيرك و غير انه يسمع هرتلاتك و يحتويك و يأييدك في كل مواقفك اللي انت غلطان فيها و يحسسك ان الدنيا ظالمك... و انت تستحق نجمة من السما و انك أعظم صديق ... و متصاحبش اللي مش شايف ان الصداقة هي انك تلبي كل طلباته و ترد على كل مكالماته و تشاركه كل تفاصيل حياتك و متخبيش عنه اسرارك و إلا تبقى مش واثق فيك و اللي مش واثق فيك متثقش فيه ... و لازم لما تعطس تقوله عشان يقولك يرحمكم الله ... 

النصايح دي خلقت شعور ان الواحد يستحق المثالية في التعامل و كأنه ملك ... و بقى في صورة ذهنية انه لو حد اتعامل معاه بأقل من كده يبقى قلل من قيمته و ان الطرف الثاني ميستحقهوش و بدأت تعلي و تعلي التوقعات لحد ما طلع لها جناحات ....

اصلا فكرة الاستحقاق المبالغ دي فكرة مريضة جدا ... و بتخلق علاقات مريضة كلها وجع قلب و عقل و نفسية ...

متخليكو طبيعيين يا ناس بعيوبكم و تعاملاتكم و ،طريقتكم الخاصة اللي ممكن تبقى احلى كتير من كتالوجات السوشيال ميديا عن العلاقات الاسطورية ... 

دمتم طبيعيين اصليين ...