فاكــر أبـوك ...!!!؟
اللي سنين كان ستر و ضهر و حضن و بيت !!؟
فاكــر أبـوك ...!!!؟
و بتدعيله .. ف عـز ... سجودك و لا نسيت !!؟
و لا خـــلاص الدنيــــا ..... تلاهـي
و سهيـت عنـه ... خـلاص بالمــره
و بقيت غافـل ..... و بقيت لاهـي
حتى .. تزور ...... قبره ولو مره !!
هـوه أبـــوك ......... لمـا هتنســـاه
مين .. يفتكـره ..... إلا ضنــاه !!!؟
دا انت الـزرعه اللي مفيـش غيرها
وانت .... حصاد زرعتـه .. و شقاه
فاكـر .... دلعـه .... و خوفه عليك
و سنين .. عايش .... فيك بيدادي
و أما .. سجد .... من فرحته بيك
يوم ما انجحت .. ف تالته اعدادي
و حضنه الدافي ... الطيب .. جدا
اللي .. ما تستغنـاش ... يـوم عنـه
و صوت دعوته .... و الفجر بيدّن
إنه ... يشوفك ......... أحسن منه
فاكـر ... حلمـه ....... اللي اتمنــاه
لو ف نهـــــاره ... أو ... ف منامـه
لو ركـزت ... ف عينـه ..... شـويه
كنت .. عرفت ..... إنك .. أحلامه
أيوه ... الحلم ........ اللي بيتفسر
قدام عينه ............ و هوه مكمل
كنت فهمت .. ان انت ...... مقصر
في اللي عشانك .. عاش و اتحمل
عشت العمــر ...... تقـوله انا عايـز
و هوه يقول ..... حاضر يا جميـل
ليه دلوقتي ... تعوزك ..... روحـه
و انت .. تكـون على الغالي بخيـل
بص لـ صـورة أبوك ..... ع الحيط
نازلــه .. دموعهـا ... بتروي البيت
نازله .. تعاتب فيك ...... و تقولك
إنت إزاي ... يا ضنايـا .... نسيت!!!؟
.
.
.
.
25