صعيد مصر ( مربعات الواو)اول ما امدح واصلي.. بركاتك نبينا تحضر

الا نورك وصل لي.. نور طريقى اخضر

والله ما ابدأ إلا بيه.. نبي زين والإسم طه

يلا صلوا علي نبيه .. شفيع الأمه وغطاها

جالي طبيبي رحمشي.. داس ع الجروح واللي فيها

والنفس طمت راح امشي.. فايت البلاد واللي فيها

جالي طبيبي معشاي.. حلو ظريف المعاني

وان زاد السكر مع الشاي.. ما ببقي للشاي المعاني

الناس كلها طايبه لي.. طاب ليه قريبى ما طاب لي

نصحني طبيبي المبالي.. وقال قول لله يا طبلى

رضيت باللي كاتبه لي.. قال موش انت المبلي

المبلي ابو قلب اسود.. في الود ليه قطع حبلى

الإنسانيه فى الكافر

اتريه افضل من ناس لك

يبكي لفراقك إن سافر

امال لو كان من نسلك

غل القلوب ليه طافر

والذاى مع بعضنا نسلك؟!

شجرة المحبين تنشاف.. ولو طالت عليها الليالى

والفرع اخضر ما تنشف.. من فوقه القمر يلالي

ولا عادش حاجه منصفه.. ولا حتى ايه اللي داير

 لا اسم علم من صفه.. ولا مين غلا السجاير

لفيت بين اللوادر.. زيه ف الكون ما ورد

وفحتوا طلعت نوادر.. لا طلعوا بصره ولا ورد

ولا كان جنيهنا ف ازمه.. وحكايته الف لليه( أ . ى ) 

جه الوقت الدولار بحزمه.. وبدأنا من اليف بن( أ. ب )

يا صاحبي في خط سيرى.. ياجي كل جنيه. القفه

وانا عارف ولا فيش غيري.. واقع من قعر القفه

وطول ما صومنا وصلينا.. وعلي لقمة عيش بنعافر

حتى لو الجوع وصل لينا.. ما يخاف الموت غير كافر

لا آقلب له مره.. ماجور.. ولا تاني فيه حدادي 

سيبه علطوا ماجور.. من بين حبة حدادي

بابورك ولا نار معدي.. ولحد ما ف وشي كشح

وفي اي محطه يهدي.. وياجي مكانه مرشح

بابورك ولا نار معدي.. ولحد ما ف وشي كشح

درباس جنبه معدى.. وده مربع ولا موشح

ع الخسيس

وما يعجن طيني غير تبنى . والحيط يقوي باساسه

ومهما ع الندل تبني. نازز تحته الخساسه

الكداب

يا اللي انت علينا كاروك.. طرطقت ليهم ودانك

لما ع الديون كروك.. ده كدبك.. دانا. ودانك

***

والبنت دي شق الحيط.. واتبلط فيها ما تبلط

ولا توزن فيها بالخيط.. همك في الخط مبلط

خفينا عشانه قدمنا.. وآهو قولنا عيش وملح

لقيناه رامح قدامنا.. فى المشيه بيجلح جلح

ونقول مانقول ع الندل.. غير المعروف لم عقه

ولا عمره هيعرف عدل.. ولا حق ياناس غير حقه

وانا بحمد خالق الفطرة.. وما نيش لئيم ولا داكن

والقلب اللي يفيح عطرة.. من فيه النبي زين ساكن

ولا ترمي يوم ع الندل.. حتي طوبه في مقطف

ومن يومي عارف العدل.. وغير من ثمري ما اقطف

وصحبت صاحب يا ناس.. كانت رجلى علي رجله 

ما زرعته ف يوم اناناس.. ولا خضر حتى رجله

مربعات واو رومانسي

قلبي مات عاللي ليه.. فيها ايه ما احب واريد

قلبي عيان عليليه..مقطوع فيه وريد

وهديه جات من السما.. ع القلب بلسم ونسمه

جات لروحي منسمة.. تنسي من شافها اسمه

وأنا بزرع وأجني تين.. غماز إلخد سناره

يا بوي ع الوجنتين.. ما يكونش منجة سناره

وانا بزرع واجني تين.. فات يمي غزال امور

عليها يا يعم وجنتين.. ماتقولش منجه تيمور

ولو كان لسه باقي.. في عمري حبة غرام

إنت نخيل السباقي.. حتى ولو اخر جرام

ولا اي كلام ف الهوا.. اقدر اوصف بيه هواها

يا بلسم قلبي والدوا.. نابع من روحها ونواها

حبهت كله ولا الهوا. راضع من نبع نواها

هي بلسم روح والدوا.. وهي قلبي اللى نواها

قلبي لم لمس حور.. ولا شاف مثلك قوام

ولا قلبي يكون مسحور.. لما عشقك قوام

يا قلبي خليك شواف.. مرعوش فاكرك شديد

خايف تقطف جواف؟ .. ولا خايف تروح في حديد

إلتين محلا قطيفه.. ويملا كمان علوانه

ناعم ماتقولش قطيفه.. ما تقولي فين علوانه؟ 

وإلغاوي يريح سرجه.. علي ضهر حصان أصيل

غير كده يعملك فرجه.. وكل ما تعدله يميل

يا مصفياك مصافي.. مشاعرك سلوك الدهب

ولولا قلبك ما صافي.. ملك الملوك ما وهب

ميزة واكبر ميزه.. استاذتي في التربيه.

وف هواي تلميذه.. عزفت علي الوتره بيا

يا بستان المحبه.. والحنان واللطافه

فمك كما الحبه.. وعودك كما الصفصافه

جالي طبيبي رحمشي.. داس ع الجروح واللي فيها

النفس طمت راح امشي.. وافوت البلاد واللي فيها

جالي طبيبي.. معشاي حلو زاد لمعاني

ان زاد السكر مع الشاي.. ما يبقاله معاني

والله لاختم كلامي.. بمسك الرسل وختامها

صلاتي عليه وإسلامي.. بختم النبوه ختمها