بابا .... لو سمحت عاوزاك في موضوع

- اتفضلي ... بس لازم يكون موضوع مهم ليس له علاقه بالحضانه

بابا .... انت مش قلتلي ان اسرائيل دي وحشه و واخده ارضنا

- ايوه طبعا ....

- طيب يا بابا انت مش قلتلي انها بتقتلنا و بتبهدلنا

- مظبوط يا حبيبتي

- طيب مين الناس اللي اسمهم حماس و مين التانيين اللي اسمهم فتح دول

- و سمعتي عنهم فين يا حبيبتي ؟ !!!!!

- انت فاتح الجزيره طول اليوم ....مصدعانا ... عمالين يقولوا فتح .. حماس ... فتح ... حماس ... هي فلسطين اتحررت و لا ايه ؟

- لا لسا شويه ... يعني علي وشك

- طيب يا بابا انت قلتلي ان الفلسطينيين بيضربوا اليهود عشان يحرروا ارضهم .... و انهم ابطال

- طبعا يا حبيبتي ... دول ابطال و بيكافحوا من زمااان و بي.....

- بابا ... اسمعني بس ... انت كلامك غلط !1

- ايه يا بنت .... بابا عمره ما يقول حاجه غلط 

- لا يا بابا انت كلامك كله غلط

- ليه يا بنتي ؟

- عمال تقولي دول بيحاربوا اليهود و دول بيكافحو .... هما فتح و حماس يهود .... عمالين يضربوا في بعض و يقتلوا في بعض ليه ... مين فيهم يهودي و مين فيهم مسلم ؟

- و الله دي امور سياسيه و المف....

- بابا .... اعترف انك غلطان ...

- بصراحه ... مش عارف اقولك ايه ... بس بغض النظر عن شوية الاخطاء الطفيفه بتاعت فتح و حماس هما مناضلين

- يا سلام يا بابا .... انا لو جبتلك كل زمايلي في الحضانه مش هتقدر تقنعهم بالكلام ده

- بقولك ايه .... بطلي كلام و خشي نامي

- هو انت لما تطلع غلطان تزعق

- طيب انت عاوزه ايه بالضبط دلوقتي

- عاوزه اعرف مين الصح ... و الناس اللي ماتوا دول اللي اسمهم حلس شهداء و لا رايحين جهنم ... و الا قتلوهم مناضلين و لا قتله ... و هل فلسطين اتحررت لا لسه ؟ ... و امتي ؟ ... و ازاي؟

- انت عاوزه الاجابه امتي ؟

- شكلك يا بابا مش هتعرف تجاوب .... احكيلنا احسن علي الكوره

-----------------------------------------------

و فعلا لم استطع اجابتها ... فهل يغششني احد اجابة السؤال ؟ !!!!