خدوا عندكم حصللي ايه على صباح ربي،، ثلاث مشاهد يحرقوا الدم

مشاهد كاشفة (حدث بالفعل)

مشهد أول

النهاردة الصبح بدري دخلت لي لي بنتي اوضتي مفزوعة ماما الحقي الامتحان اتسرب( امتحان (geometry) بتاع الاعدادية)

قلتلها ازاي، قالت لي صاحبتي بعتته على واتس اب بس بالعربى 

قمت مفزوعة وقلت لها،، اوعي تفتحي الرسالة، 

لي لي قالت يا ماما المستر قال الامتحان جاي صعب جدا وزمايلي فتحوا الرسالة وهيجيبوا درجات عالية كلهم (وهيقفلوا)

قلت لها انا عمري ما طلبت منك درجات عالية، اعملي اللي عليك والباقي مش بتاعنا، بتاع ربنا لكن غش لا يفتح الله بينا وبينه. وبعدين ده نموذج للامتحان مش الامتحان نفسه،

وفعلا البنت مفتحتهاش الرسالة، ولا هي ولا اختها ودخلوا الامتحان وجه صعب جدا فعلا وزمايلها اللي فتحوا الرسالة (قفلوا) الامتحان من (النموذج)

ولي لي ولينة بناتي خرجوا يعيطولي وقلبي اتقطع حرفيا على عياطهم، مش من صعوبة الامتحان، طبعا مفهوم عيطوا ليه 

--------

مشهد تاني 

الست غادة والي في فيديو قميء شغلته بتقول لعمرو أديب بوقاحة منقطعة النظير ان اللي حصل ده مش غش ده (اقتباص) اللي هي اقتباس باين. ! 

وقالوا عى طريق الكباش انه اقتباس من تلامذتها ف الجامعة يا ولداه عليهم ومحدش فتح بوقوا عشان صغيرين ياعيني وصباعهم تحت ضرسها

------

مشهد تالت 

والد احمد بغدودة، لاعب المصارعة الهارب من جحيم الاتحاد المصري للمصارعة بعد ما حصل على ١٦ الف جنيه جايزة ميدالية فضية من تونس،، خدوا منهم ١٤ الف و٨٠٠ جنيه ضرايب وسابوا للولد البطل الغلبان ١٢٠٠ جنيه (والعهدة على والده) اللي بيحكي... ويكمل الأب اللي بيشتغل سواق توكتوك (ده غير معاملة سيئة من المدرب وكان ممكن يهرب من كرواتيا السنة اللي فاتت لكن مهربش الا لما فاض بيه)

طب ايه يا ست مصر؟ مالك بعيالنا؟ دول ولادك اللي جيبتيهم ف الحلال يا ست مصر

 (الجملة الأخيرة اقتباس من الشاعر مصطفى ابراهيم: 

واللي فاضل يا افاضل هو ده تعداد وحصر للعيال اللي جابتهم ف الحلال الست مصر)