يوم في الطريق إلى القسم




مع اشراقة يوم جديد شهدتها بعيني
كنت سهرانة طول الليل حتي طلوع الشمس عشان انتهي من التصميم الى فى ايدي
الدكتور نبه علينا السكشن الجاي لازم كل واحد يجيي ومعاه تصميم مبدئي لمستشفي
دعونى احكي لكم
مادة التصميم المعمارى بيدرسها لنا 2 دكاترة و2 معيدين
فى كل سكشن بيعدي علينا الاربعة لمراجعه المشروعات كل طالب على حدي واحيانا بيكون في سيمنار(مناقشة جماعية )
كل واحد بيعلق مشروعه والدكتور بيناقشه معاه واحنا كمان كل واحد بيعلق على المشروع او بيستفسر عنه وبيسال صاحب المشروع على فكرة اهم شيء فى المشروع حاجة اسمها الكونسبت (يعني الفكرة او الاساس الى بتتبني عليه فكرة المشروع او بصيغة اخري مدخل المشروع )نسيب الكونسبت ده لانه محتاج لشرح طويل محتاج يوم لوحدة
خرجت من السكن مسرعه ومعايا كل عدة الشغل قصدي الرسم من مسطرة حرف تي ومثلثات وبراجل واقلام رصاص ورول اللوحات والخ,,,,,,,,,,,,,,,,,,,,,,,,,,,
مشهد نهاري
الطريق بين السكن والكلية هم شارعين عشان كدا كنت بمشيهم ما انا فى المدينة الجامعيه ( بالمناسبة فكرونى اكتبلكم عن حياة المدينة محتاجة على الاقل عشرين يوم )
اما امشي الطريق دي او اركب تاكسي وطبعا لان المشي رياضة بالذات لما تكون شايل حاجات كتير وملخوم كده يبقي المشي جميل من كتر ما مشيت فى الشارع الطويل ده وكل مرة وانا بمشي بفتكر اغنية العندليب الى بتقول "يا شارع الضباب مشيت انا مرة بالعذاب ومرة بالهنا " وفعلا كل مرة بمشي فيه باحساس مختلف بشوفه بطريقة مختلفة يعني لما اكون متضايقة وقرفانة من السكن والكلية وهم دول كل حياتى فى الفترة دي كنت بشوفه مالهوش اخر ومظلم
ولما بكون سعيده لاى سبب كنت حاسة انه جميل ومليان اشجار وزهور والاشجار جميلة مزهرة والزهور مبهجة
نسيت اوصف لكم الشارع
فى الحقيقة هو شارع بيوصل لقسم عمارة راسا بعيدا عن بوابة الجامعه وبوابة الكلية لانه بيدخلك على قسم عمارة من الخلف وموجود فيه جميع ورش لكليه الخاصة بميكانيكا واخره بيوصلك لشارع رئيسي الى جاي من كلية طب الى الشارع الرئيسي الخارجي الى بيوصل للمدينة الجامعية اسفه توهتكم
الشارع هاديء جداااااااااااا فى فترة بعد الساعه 2 ظهرا بتكون الورش مقفولة وعلى جانبيه مجموعة اشجار وزهور قليلة
انا طولت فى وصف الشارع بس ده لما له من تاثير كبير على ومن كتر عشرتي له لانه كان اقصر الطرق الممكنة
فى النهاية بوصل للباب الاسفل لقسم عمارة الباب الى فى دور البدروم
دعوني اوصف لكم قسمي الحبيب والا اقولكم احكي لكم عن الكلية كلها
الككليقة كلها مجموعة اقسام كل قسم فى مبني وبينهم ساحه عظيمة واسعه جميلة بها من الاشجار والزهور ما يبعث البهجة فى قلوبنا
وقسمنا العزيز اللذيذ كان منعزل شوية هو وقسم كهرباء جارنا الاقرب لنا
قسمنا كون من دور ارضي ودورين علويين
مشهد داخلي
من السلالم الكتير الى على باب القسم بندخل على الدور الاول وفيه صاله كبيرة مربعه ارضيتها رخام اسود يتوسط الصاله تمثال جميل متوسط الحجم وعلى الجدران معلقة مشروعات مميزة لطلبة القسم منهم من بقي معيد فى القسم وامامك على مرمي البصر غرفة السكرتارية والاستعلام وعلى يمينك طرقة توصل لغرف الدكاترة وعلى الشمال قاعة كبيرة "مدرج" وعلى جانبيه غرفتين للسكاشن
وبجوار غرفة السكرتارية سلم بيوصل للدور الثاني او بتنزل للدور الارضي
تعالو نشوف فى ايه فوق
فى صالتين رسم كبار جدا كل صالة منقسمة لجزئين
واحدة للصف الاول والثاني والثانية للصف الثالث والرابع
وغرفتين كمبيوتر وغرفة معيدين واستراحة طالبات
وننزل بقي للدور الارضي
نلاقي معرض كبير بيضم اجمل واميز وافض المشاريع على مر السنين ومن صفوف مختلفة وماكتات رائعة حقا
مشاريع متنوعة تخطيط وتصميم وكل حاجة
وفيه مصلي للرجال
ومخزن
انا طولت قوي فى وصف القسم بس دا مهم جدا عشان تشوفوا معايا المكان الى عشت فيه الايام الى بحكيلكم عليها ايام فى حياة طالب عمارة
وغدا يوم جديد
يوم فى صالة الرسم "مع سكشن تصميم "