من الاسئلة اللي جاوبت عليها النهاردة سؤال من سيدة زوجها توفى وترك شقة إيجار وعفش البيت ومعندهاش أولاد! فأخوات الزوج عاوزين نصيبهم من العفش باعتبار أنه ميراث ! يعني العفش اللي الست عايشه عليه عوزين يبيعوه ويخدو نصيبهم منه! وهيا مش مهم تعيش على البلاط!! للأسف الشديد منتهى الوضاعة والحقارة والانحطاط ! الشريعة مش بس آيات مواريث وحقي وحقك ! الشريعة أكبر من كده الشريعة " ومن كان غنيا فليستعفف " الشريعة " ولا تنسوا الفضل بينكم" الشريعة " وأحسنوا إن الله يحب المحسنين" الشريعة حاجات كتير ممكن اكتبهالك في كتاب ! المهم اتغظت جدا من انعدام النخوة وضياع المروءة وغياب الشهامة واختفاء الرجولة فسألتها جوزك كان كاتبلك مؤخر فأجابت بنعم فانفرجت أسراري وتنفست الصعداء وعلت السعادة وجهي ! فسألتها كام يافندم فقالت ٤٠ ألف جنيه فسألتها طبعا مدفعهمش؟ فقالت نعم ! فازداد سروري وحبوري وكدت أتمايل طربا وفرحا لولا أني كنت في المواصلات العامة والأتوبيس زحمة جدا ! فقلت لها حلو ! قوليلي للبهوات معنديش مانع طبعا نقسم الميراث بس أنا سألت شيخ وقالي لازم قبل توزيع التركة تسديد الديون! وأخوكم مديون لي ب٤٠ ألف جنيه وطبعا العفش مش هجيب المبلغ ده وأنا لي فيه كمان الربع كده حضراتكم مديونين ليا ! فتنفست المرأة الصعداء وشعرت أنني أعطيتها الحبل الذي سوف تخنق به هؤلاء الأنطاع فشكرتني على ذلك !