تغيير شعب

في يوم من الأيام كان عندي امتحان في مادة الفقه المقارن دخلنا اللجنة وعلى بركة الله تم توزيع أوراق الأسئلة والطلبة بدأت تحل 

ببص في الورقة اكتشفت إن ده امتحان في مادة أصول الفقه مش في الفقه المقارن فرفعت راسي ولقيت الطلبة ماشاء الله منهكة في الحل والكتابة فرفعت صوتي وقلتلهم أنتم بتحلو إيه ياجماعة ده مش امتحان فقه مقارن ده امتحان أصول فقه ودي المادة الجاية حسب الجدول مش مادة النهاردة ..  

المراقبين قالولي أنت بتتكلم بجد قلتلهم هي الحاجات دي فيها هزار ... لم حضرتك منك له الورق من الطلبة.. وأنتم يا طلابي الأعزاء توقوفوا عن الكتابة ههههههه ...

وخرجت من اللجنة وبصيت على كل اللجان لقيتهم ماشاء الله الكل بيحل بجد ونشاط فتوجهت لرئيس الدور وقلتله نفس الكلام.. 

تم جمع الأوراق من جميع اللجان بعد اكتشاف هذا المهزلة .

اللي بيتدل إن أحنا عندنا مجموعة من الموظفين معندهمش أدنى قدر من المسؤولية وبيتمتعوا بقدر عالي من الإهمال واللامبالة 

وهنا تكمن أزمة مصر الحقيقة جزء كبير من الشعب فوضوي.. مهمل 

كسول ... هل يا ترى تم محاسبة المتسبب في هذه الفضيحة ؟!

متأكد إنه محصلش وتمت الطرمخة على هذا الإهمال الجسيم بنجاح..

من باب ده زميلنا ولازم نغطي عليه ومن باب فوتلي وافوتلك وطرمخلي واطرمخلك.... 

طبعا امتحان أصول الفقه كلنا شوفنا أسئلته بس تم تغييره للأسف ومجاش ههههه .

مصر مش محتاجه تغير حكومة أو وزير لااااااا 

مص محتاجه تغيير شعب والشعوب عمرها ما بتتغير يبقى مفيش حل غير تغيير ثقافة الشعب وزيادة وعي الشعب وزيادة انتماء الشعب وده مش بيحصل في يوم وليلة ولكن للاسف بياخد سنوات طويلة وإلى أن يتم المراد من رب العباد ربنا يستر على هذا الوطن.