جدتي ربنا يديها الصحة والعافية

امرأة تقية نقية قوية عاقلة حازمة صاحبة خبرة وحكمة وروية! 

كنت أسمعها دائما وأنا طفل صغير تكرر مثلا شعبيا عند المنازعات والخصومات الزوجية حتى حفظته عن ظهر قلب

فكانت تقول " اللي يقول لمراته ياعورة الناس تلعب بيها الكورة" 

أكبر خطأ ممكن يرتكبه الزوج أنه ينتقد زوجته قدام الناس أو يقل منها حتى لو كان في شكل ضحك وهزار !

زوجتك هتكرهك وهتستنقصك وهتنزل من نظرها ! 

زوجتك فيها عيوب صحيح محدش خالي من العيوب! حتى أنت فيك عيوب حط نفسك في نفس الموقف وأنت في زيارة نسايبك وزوجتك بتنتقدك أدامهم أو بتقل منك حتى لو على شكل هزار وضحك أكيد هتزعل يبقى لا يؤمن أحدكم حتى يحب لأخيه ما يحب لنفسه! 

احترم علشان تحترم ! 

متقلش من مراتك قدام أهلك علشان تثبت لهم إنك دكر ومسيطر علشان دي دناءة ومرض ونقص في الشخصية خليك راجل محترم! 

متسمحش لحد من أهلك يقل من مراتك ولو حتى بهزار 

سواء أمك أو أبوك أو أخوك أو أختك!

ولو مقدرتش تحميها يبقى متفرضش عليها التواجد في مكان بتتهان فيه!