السعودية وطني الثاني

أنا واحد درست في السعودية في مدارس تحفيظ القران الكريم ودي مدارس دينية بتدي مكافأة شهرية 

بتدي في ابتدائي ٢٥٠ ريال 

واعدادي ٥٠٠ ريال 

وثانوي ٧٥٠ ريال 

ولكن اللي بيسقط ويعيد السنة كان بيتحرم من المكأفاة

 فكان كل شهر الصراف يدخل الفصل وكان يسلمني المكأفاة وأنا مصري وكان ميديش زميلي السعودي علشان هو بيعيد السنة ودي كانت عندي كبيرة أوي إن الدولة بتدي طالب غير سعودي مكأفاة وبتحرم ابنها السعودي!! 

مش بس كده !!

طبعا الكتب كلها مجانية وكنت باستلمها من المدرسة 

مش بس كده !!

حتى ملابس الرياضة والشوز الخاص بمادة التربية البدنية كنت بستلمها من المدرسة مجاناً

  زي زي اي طالب سعودي !!

ومش أنا بس كان معايا طلاب من السودان واليمن وفلسطين وسوريا وكانت الدولة السعودية لا تفرق بينا وبين ولادهم السعوديين. 

ده على المستوى الدولة والحكومة

 أما الشعب السعودي فهو زي أي شعب فيه الحلو وفيه الوحش ولكن الحلو هو الأغلب ناس أهل كرم وأهل شهامة وأهل أخلاق.

نظام الكفالة في السعودية نظام سيء وأتمنى يتم إلغاؤه ولكن بكل أمانة المكفول في الأغلب هو اللي بيظلم نفسه لما بيوافق يطلع بمرتب ضعيف أو يطلع على مهنة غير مهنته أو يطلع بعقد صوري أو يخالف الأنظمة ويشتغل عند غير الكفيل !

ولكن لو معاك عقد نظامي وكفيلك ظلمك وروحت مكتب العمل الكفيل ده بيتنفخ حرفيا و بتاخد فلوسك من حباب عينه .

السعودية وطني التاني بعد مصر عشت فيها نص عمري وشايف إن حقها عليا أدافع عنها وأقول كلمة حق وهيا بتتعرض لهجمة شرسة حاليا وحملة تشويه متعمده بدافع العقاب والانتقام السياسي الغربي .