أحيانا بينتشر فيديو لأحد شيوخ السلفيه وهو بيمدح في الجيش المصري أو بيدافع عن الجيش المصري وبيطلع الفيديو ده ترند فبلاقي ناس بتسألني هو مين الشيخ ده اسمه إيه الشيخ الجميل ده 

أحنا عاوزين نتابع هذا الشيخ !!

أيوه يعني على أساس إيه أصدرت حكمك عليه بالجمال ؟!!

علشان فيديو خمس دقايق ؟! 

هو علشان يعني اتفق معاك في قضيه من قضاياك يبقى خلاص كده حصل على شهادة الأيزو والصالحية وبقى شيخ صالح للمتابعة والاستماع وانك تتعلم منه ؟!

 لا طبعا ده كلام غير صحيح.. حضرتك ما تعرفش بقية أفكار هذا الشيخ الجميل !!! 

البعض متخيل علشان شخص قال كلمتين حلوين هيبقى كلامه كله حلو ؟!

لا حضرتك الشيخ الجميل ده مكفر نص المجتمع وشايف الناس مشركين وكفار ومبتدعة !!

الشيخ الجميل ده شايف النقاب فرض والحجاب ده تبرج وسفور وانحلال !!

الشيخ الجميل ده شايف أنك ضال في العقيدة ومنحرف عن المنهج الصحيح!!

الشيخ الجميل ده شايف إن اتباع المذاهب الفقهية ضلال ولازم تتبع ابن تيمية حصرا .  

الشيخ الجميل ده شايف إن الفن والموسيقى والرسم حرام حتى لو كانت موسيقى النشيد الوطني!!

العقلية المسلمة عقلية فارقة مش عقلية ساذجة مكمن تنخدع بكلمتين حلوين .. 

أي شخص مهما كنت بتحبه أو متابعه معهوش صك العصمة من الخطأ 

ومش معنى إنه صح في قضية أو موضوع أنه هيبقى صح في كل القضايا أو كل المواضيع..