إهمال شعبي

بحكم إني بسافر كثير جدا وشفت حوادث كتير على الطرق السريعة ونجوت من موت محقق بفضل الله تعالى في عدة حوادث آخرهم كان من شهر تقريبا وكنت متجه من الاسكندرية إلى القاهرة وعلى كوبري العامرية كنت راكب ميكروباص وجمبنا تريلا و الميكروباص والتريلا طالعين سوا على الكوبري فيجي في النص سواق تروسيكل متخلف عاوز يطلع من التريلا ومن الميكروباص وهو على الكوبري وطبعا اتزنق في النص وكان هيجي تحت عجلات التريلا وسواق التريلا فرمل و سواق الميكروباص فرمل والتروسيكل اتقطم نصين ودخل في الميكروباص من جهة الكرسي اللي كنت قاعد عليه وبسب الفرامل المفجأة اتخبطت خبطة بسيطة وكان ممكن جدا التريلا تخش في الميكروباص وتفرمنا كلنا بسبب سواق تروسيكل متخلف مش قادر يصبر دقيقة واحدة لحد ما التريلا والمكيروباص يعدو وقرر أنه يعدي منهم ويسبقهم.. والحقيقة في دقيقة واحدة المرور طلع من تحت الأرض وعربية إسعاف اتواجدت في المكان وفي ثواني تم رفع التروسكيل والتريلا نزلت واحنا نزلنا من الكوبري والسواق اتصل بعربية في الموقف علشان تكمل معانا السفر والطريق مشي بعد خمس دقائق مش اكتر.

عاوز أقولك إنك لما تيجي تبحث في أغلب أسباب حوادث الطرق السريعة هتلاقي الأسباب مشابهة ومعظمها مش هاتخرج عن الإهمال أو التهور أو التسرع أو مخالفة القانون.

يعني هتلاقي مثلا سواق مكيروباص مطبق ومنمش ونام في السكة 

أو هتلاقي سواق تاني بيمشي فوق السرعة القانونية وعمال ياخد غرز شمال ويمين والغريب والعجيب إن الركاب في منتهى السلبية ولا حد بيقوله اللي أنت بتعمله ده ؟! لا بيكونوا فرحانين إنهم هيوصلوا بسرعة مع أنهم ممكن يوصلوا للآخرة بالطريقة دي 

أو هتلاقي سواق تريلا مخالف وسايب حارة الخدمات وماشي في حواري الملاكي..... 

ممكن يكون في إهمال وتقصير من المسؤليين ولكن يقيني إن الإهمال الأكبر إهمال شعبي متعلق بالثقافة والسلوك.. 

محتاجين توعية كبيرة للمحافظة على أرواح الناس على الطرق وتكتاف من كل المنابر سواء الدينية أو الإعلامية أو الثقافية أو الفنية رحم الله شهداء وضحايا الطرق في العالم أجمع .