مهرجان MetGala2022 و فساتين الصدر المفتوح

مهرجان MetGala2022 في امريكا السنة دي كان موضوعه عن ال Gilded Glamour العصر الذهبي لامريكا في الفترة التاريخية بين 1870 و 1990 عندما شهدت نموًا اقتصاديًا هائلاً وتصنيعًا سريعًا.

معظم الفساتين صدرها مفتوح بكل الطرق، في منها جميل وفي منها قبيح، كل مصممين الازياء استخدموا الصدر كنقطة جذب رئيسية. انا مش بحب الطريقة دي لان كل الناس هتبص على الصدر وهتسيب تصميم الفستان. مفيش فن ولا ابداع حقيقي.

6 حاجات لاحظتها فيه:

1- من اجمل الامثلة لسيدة كبيرة في السنين تبدو جميلة وانيقة ومحترمة ومحتشمة. بشعر ابيض مش مصبوغ. أفضل مثل للاغنياء ازاي يظهروا بدون جنون.. وهي في السن ده مش محتاجه ترسم الجسم ولا تظهره. فستان قطيفة ولؤلؤ بيعكس الازدهار، يعني مناسب لموضوع المهرجان كمان.. فستان Maye Musk..

2- فستان كيم كارديشان. يقال ان هو نفس فستان مارلين مونرو ال لبسته في “Happy Birthday Mr. President” 1962. اتباع في مزاد في سنة 2016 ب 4.8 مليون دولار. السوشيال ميديا بره كلها بتتكلم ازاي هي قدرت تحصل عليه، انا مش مصدقه انه هو نفس الفستان وبكون مظبوط عليها كده.. من خلال خبرتي في مجال الازياء اكثر من 20 سنة مشفتش جسم سيدة زي التاني. مثلا مقاس صدر مارلين 94سم أما كيم 101سم. اعتقد دي نسخة معدلة منه..

3- مصمم الازياء Tom Ford ملك تصميم البدلة الرجالي في العالم. انا برشح الصورة دي لاي راجل عاوز يشتري او يفصل بدلة زواج. بتبين العلاقة بين الطول وال Slim. يعني في علاقة بين ضيق البنطلون وطول الرجل. لاحظت في مصر انهم بيعملوه ضيق جدا سواء الرجل طويل او قصير وده غلط..

4- رسالة مصمم الازياء Alessandro Michele بتاع Gucci وهو بجانب الموديل بتاعهم الممثل Jared Leto. بان "ليس فقط ممكن تلبس منقوش مع منقوش لكن ال جنبك كمان ممكن يلبس نفسه.. وده Gucci Style.

5- الممثلة Sarah Jessica Parker لبست فستان باستايل زوجة الرئيس الامريكي ال16 Abraham Lincoln، وصممته لها واحده سمراء البشرة كانت Slave. وده كان وقت العصر الذهبي لأمريكا!!

6- رسالة لبس عارضة الأزياء Irina Shayk.. رأيي لبسها اكتر لبس مظبوط ومقفول في المهرجان. الرسالة: احنا في وقت مينفعش نلبس فيه غير الاسود ولا ينفع نلبس فيه فساتين.

#فيرا_زولوتاريفا