- اعتقاد ان اللبس الضيق يخليكي رفيعة غلط، بالعكس الضيق بيظهر العيوب، والصح نلبس على مقاسنا مظبوط جدا لبس مصنع بالقواعد الصحيحة مش ضيق ومش واسع، ودليل كلامي أزياء ‎Marina Rinaldi.

- اعتقاد ان اهم حاجة في اللبس شكله والوانه في الفاترينة اعتقاد غلط، الحقيقة أن نوع الخامة وجودة التقفيل مهمين جدا في مظهرك.

- اللبس مش بكثرته في الدولاب، أهم من كثرته جودته. كفاية 4 قطع جودتهم عاليه تشتريهم صح بحيث ينفع تبدلهم مع بعض، ممكن تعمل منهم 4 أطقم Smart wardrobe. حتى المثل المصري بيقول "الغالي تمنه فيه".

- اعتقاد ان الحذاء مش مهم في المظهر اعتقاد غلط.. لازم نلبس حذاء جودته عاليه ونحافظ عليه وعلى نظافته جدا .

- اعتقاد ان اهم حاجة في الحذاء أو الشنطة لونهم فقط غلط، الحقيقة ان لهم تريندات ولازم نعرفها ونواكبها وغلط تشتريهم لمجرد شكلهم حلو وخلاص.

- لبس الحجاب مع بنطلون ضيق او حتى عباية مكسمة غلط، الحجاب في الفاشون يعني الطابع العام للبس كله يكون محتشم، مش جزء منه بس.

- اعتقاد ان الحجاب استايل واحد اعتقاد غلط، الحجاب عدة ستايلات والصح مثلا لما اكون في الشاطئ البس شيفون او باتيست والوان بحر، وفي الشغل الوان هادية حسب الدريس كود، ومن غير ديكور أو تطريز أو استراس، والسواريه للمناسبات فقط..

- اعتقاد ان الذهب والاكسسوار ستايل واحد اعتقاد غلط، الاكسسوار والذهب عدة ستايلات. مينفعش البس ستايلات ذهب متناقضة ومختلفة مع بعض.

- لبس الذهب في اي وقت من اليوم غلط، مينفعش لبس الذهب السواريه أو الغوايش الكبيرة أو الاحجار الكريمة الصبح، كل وقت له اكسسوار مناسب.

- لبس قطعة سواريه على قطعة كاجوال غلط. الصح ان ستايل لبسك واكسسوارك يكون واحد.

- اعتقاد ان صيحات الموضة مش مهمة والمهم انك تشوف اللبس حلو عليك وخلاص غلط جدا، الصح مواكبة اخر تريندات والتميز بها، لان حب الجديد من الفطرة الانسانية، ولازم تعرف انك كده كده هتواكبها، بدليل ان محدش بيلبس طرابيش دلوقت، فتميز بمواكبتها بسرعة متستنهاش تنتشر.. 

اعتقاد ان الموضة غالية اعتقاد غلط، انت ممكن تلبس الموضة بفلوس قليلة لو فهمتها واشتريت بالطريقة الصح المناسب منها لمجتمعك وجسمك وذوقك بسرعة اول ما تنزل فتفضل لابساها فترة طويلة فتوفر.

اعتقاد ان بعض تريندات الفاشون ثابتة مش بتتغير غلط، الحقيقة انها تتغير بالوقت كل سيزون، زي مثلا منقوش مع منقوش كان مينفعش ودلوقت ينفع، ولون الشنطة كان لازم يبقى نفس لون الحذاء دلوقت لونهم بيكون مختلف وده اوفر لنا.

اعتقاد ان الموضة حاجة واحدة اعتقاد غلط، الموضة مش حاجة واحدة ومش لبس عريان ومجنون، الموضة Trends كتير فيها ما يناسب كل الاديان والمجتمعات والاجسام والاذواق.

الفكرة انك تختار منها المناسب لك..