سينما بن البلد 4

اه والف اه من رتبه الملازم اول فهذه الرتبه في قاموسي الخاص هي رتبه الفطام فعندما يفطم الطفل يبدأ في مرحله الاستكشاف والمحاوله والتجارب المهم في عام ١٩٧٠ كنت برتبه الملازم اول وكنت في اجازه ميدانيه من الجبهه وأثناء مروري في منطقه هذه السينما وجدت شيطاني الصغير (بندق) يجلس على كتفي ويتملل فدار هذا الحوار بيننا.. 

انا:ايه مالك يابندق مش قاعد على بعضك ليه...؟

بندق: انا عايز ادخل سينما

انا: وماله يابندق بكره ان شاء الله ندخل سينما مترو

بندق: انا مش عايز سينما مترو انا عايز ادخل السينما دي

انا : سينما ايه اللي تدخلها ياحيوان انت عارف مستوى السينما ايه

بندق: ايوه عارف مستواها دي سينما شعبيه هو احنا برضه مش من الشعب ولا هاتخوت دماغي بكلامك المجعلص عن الطبقه البرجوازيه والنسيج المخملي للمجتمع.....

انا: انت جبت الكلام ده منين..

بندق: مش انت اللي بتقوله وكمان فيه حاجه تانيه بذمتك مش جواك عايز تجرب دخول السينما دي(اللئيم ضغط على نقطه ضعفي)

انا: الصراحه ايوه

بندق: طيب يالا دخلني السينما دي

انا : ماشي يابندق الكلب يالا بينا

توجهت ناحيه السينما فوجدت عبده نصحي يجلس على ترابيزه التذاكر فوقفت أمامه ودارت هذه المحاوره بيننا......

هو: افندم

انا: ازيك ياكابتن عبده انا من اشد المعجبين بيك علاوه اني عضو عامل بنادى الزمالك

هو: اهلا وسهلا... الله يحفظك... اي خدمه..

انا: عايز ادخل السينما..

هو:السينما دي...!!!!!!!!!

انا: ايوه السينما دي... فيها حاجه

هو: ايوه فيها ونص.... ماينفعش

انا: ليه.... ؟؟؟؟

هو: انا مش ضامن هايحصلك ايه  الي بيدخل السينما دي هم الغلابه   وانت بيه ولابس شيك وباين عليك مش وش بهدله وماقدرش اتوقع رد فعلهم ايه لأنهم ممكن يتشاكسوا معاك

انا:بس انا اقدر احمي نفسي كويس

هو: هاتدخل على مسؤليتك بس لازم يبقى معاك واحد من رجالتي

انا: وماله وهادفع له تذكره

هو: لا ده مجانا تحيه مني ليك طبعا هاتدخل درجه اولى

انا: طبعا

هو: درجه اولى دكك كل دكه عليها اربعه افراد

انا : يبقى انا هادفع اربع تذاكر علشان مش عايز حد يقعد جنبي 

هو :ماشي كلامك هو حضرتك بتشتغل ايه

انا: انا ملازم أول في الجيش وبخدم في الاسماعيليه وانا في اجازه حاليا

هو: ربنا يستر..... ثم نادي على احد رجاله اسمه سرسق فحضر هذا الرجل وكان قد الحيطه واصدر له أوامر بأن لا يقترب مني احد ويحرسني طوال عرض الفيلم  ثم وجهه كلامه لي بأنه عمل اللي عليه وحذرني...

وقبل دخولي السينما دسست في يد عم سرسق خمسه قروش كامله لاضمن ولاؤه والانتباه جيدا لمن حولي وما يمكن حدوثه من تصرفات غير متوقعه.

المهم دخلت السينما من باب الدرجه الاولى وكانت فتره استراحه وبمجرد دخولي ساد صمت غريب ومريب من الموجودين لأنني كنت الوحيد في السينما كلها المرتدي قميص وبنطلون وكانت رائحه السينما كلها زفاره من الدم الموجود على جلاليب المشاهدين وقادني عم سرسق الي الصف الاخير واجلسني على دكه الطرف ووقف خلفي يهز خرزانته بما معناه انه يتوعد اي مخلوق يقترب مني علاوه على اشعاري بالأمان....

    (انتظروني على شوق لما حدث)

المجد لجيش مصر.... وتحيا مصر الوطن.....