اتمام تنفيذ المهمه رقم ٢
اقتحام مركز القياده المتقدم لقياده القطاع الأوسط المعادي والاستيلاء عليه والمعروف إعلاميا بتبه الشجره...
................
استدعيت كل من الجندي عبد الوهاب عبد الوهاب محمد والجني فتحي خليل محمد السابق تعريفهما وكلفتهما بمحاوله التسلل والوصول الي أعلى التبه وكسر واتلاف جميع الهوائيات الموجوده أعلاه بغرض عزل المبنى عن العالم الخارجي وذهبا بسرعه ثم غابا كثيرا فأرسلت لهما العريف رجب محمد مصطفى (التعريف به سيحين في تنفيذ المهمه رقم ٣) وبعد قليل ظهرا ويقودهما العريف رجب أمامه ضربا بالشلاليت حتى وقفا أمامي ودارت هذه المحادثه
انا: فيه ايه يارجب
رجب: يافندم طلعت التبه لقيتهم قاعدين مجضوعين وبيشربوا سجاير احنا في ايه ولا ايه
انا: ماشي ياحيوان ان انت وهو حسابكم بعدين (تهديد في الهوا... بس لازم) عملتم ايه
فتحي: يافندم انا بقالي يومين ما شربتش سجاير علشان خلصت مني وعبد الوهاب كان معاه سجارتين فقعدنا نشربهم..
انا: انا مش قصدي كده ياحيوان حساب شرب السجاير ده بعدين لما افوق لك انت وهو انا قصدي عملتوا ايه في الهوائيات
فتحي: يافندم الهوائي الكبير صعب كسره لانه مطاط بداخله ستانلس ومثبت على قاعده خرسانه بس انا قطعت الكابل بتاعه اللي موصل للجهاز جوه المركز وبقي غير صالح.
انا: وباقي الهوائيات
عبد الوهاب: انا قطعت الكوابل اللي موصله ليهم برضه.
فتحي: معلش والنبي يافندم مش هاشرب سجاير تاني
انا: ياحيوان تبقى قاعد مرحرح وبتشرب سجاير وزمايلك قاعدين مستنينك والله لامرر عيشتك بس لما نخلص (تهديد في الكلتش برضه.... بس لازم)
فتحي: يافندم انا غبت شويه علشان اتمشيت فوق التبه استكشفها من فوق لقيت فيها فتحه ظاهر تحتها نور لمبه جاز.
انا: فتحه...؟؟؟؟ فتحه ايه وفين
(وقفز في ذهني على الفور الحل السحري للاستيلاء على مركز القياده.) عارف مكانها
فتحي: ايوه يافندم في آخر المبنى يمين.
انا: طيب اطلع تاني ليها وارمي فيها قنبله ثرميت بس خلي بالك ماتظهرش نفسك وارميها وابعد عن الفتحه.... فاهم ولا اكرر
فتحي: حاضر يافندم
انا: لو عملت ده هااديك علبه سجايري كلها...
ذهب هو بسرعه واصدرت أوامر لكل من الملازم شوقي قائد الفصيله الأولى والملازم عبد الحميد احمد حسن قائد الفصيله الثانيه بالاستعداد في وضع ضرب النار والجاهزيه للاقتحام اما بالنسبه للفصيله الثالثه بقياده الملازم ثروت فأمرته بتأمين الاقتحام وبعد قليل سمعت انفجار قنبله مكتوم بداخل المبنى وفتحت أبوابه فجأه وخرج من كانوا بداخله كالفئران المذعوره يجرون في كافه الاتجاهات...بس خلاص.!!!!!!
ودخلت المبنى فوجدت احد ضباطهم مختبئ خلف جهاز تنقيه الهواء...... بس خلاص..!!!!!!
قمنا بتفتيش المبنى كله ووجدت به كم هائل من الوثائق والخرائط العسكريه فأصدرت أوامر بعدم المساس بها(نقلت في الصباح إلى الجهات المسؤله) ثم أمرت بتطهير المبنى.....!!!!!!!!!!
التطهير يااحبابي ليس كما تظنون برش مواد التطهير كما تفعلون لمواجهه فيروس كورونا بل معناه بلغتنا نحن المشاه ساده المعارك هو التإكد التام من عدم وجود أي كائن حي في منطقه الهجوم علاوه على إفساد وتدمير جميع الاجهزه والمعدات الموجوده وأثناء ذلك كان ضباطي وجنودي في منتهى..... منتهى.... منتهى السعاده والفرح وطبعا وانا معهم بتنفيذ تلك المهمه الصعبه وبهذه السهوله والتي لم تستغرق سوي ٤٥ دقيقه فقط.... وأعطيت تمام تنفيذ المهمه بدون خسائر في الارواح او الاسلحه او المعدات للسريه لقائدي العظيم وأرسلت له عينات من الخرائط فأمرني بسرعه ترك المبنى والتقدم شرقا لمسافه ١كم وعمل موقع دفاعي سريع تحسبا من محاوله العدو استعاده الموقع أو قيامه بالقصف المدفعي او قصف الطيران عليه.... ونفذت ذلك على الفور وكان فجر يوم ٩ أكتوبر قد بزغ وبزغت معه حلاوه الانتصار والسياديه المصريه على أرض سيناء......
نحن المشاه ساده المعارك
انتظروني للمهمه الثالثه
المجد لجيش مصر.... وتحيا مصر الوطن...
2
-2
