في صباح يوم ٥ أكتوبر ٧٣ كانت سريتي قد استلمت المهمه التي ستنفذها خلال الحرب وكل فرد في السريه قد تفهم مهمته وكيفيه تنفيذها وكان التركيز هو السمه الرئيسيه في تصرفات كل فرد والتحفز كان قد تسلل في كل جزء من أجسامنا والروح المعنويه في أعلى حالاتها.... تلقيت اتصالا هاتفيا من قائدي العظيم المقدم اح / رجب عثمان دار كالآتي......
هو: صباح الخير ياطلبه
انا : صباح النور يافندم
هو: اخبار سريتك ايه..؟
انا : زي الفل يافندم...
هو: قوارب العبور لسريتك هاتوصل الساعه ٩ مساءا وكل قارب هايجي معاه فرد من المهندسين مخصص لتشغيل مواتير القوارب
انا : انا مجهز كل حاجه بالنسبه لموضوع القوارب بس يافندم لو سمحتلي انا شاكك في موضوع عساكر القوارب دول وبرضه المواتير وأعتقد انهم مش هايبعتوهم بس انا عملت حسابي
هو: مش عايزين نفرض البلا قبل وقوعه خلينا نستنى ونشوف
انا : حاضر يافندم
هو: ابعتلي ١٠ عساكر بلبس اللياقه
انا : والله يافندم ماعنديش ولا عسكري فاضي وبعدين لبس اللياقه تم تشوينه وإرساله للمؤخره
هو: ياطلبه بقولك ابعت ١٠ عساكرالقياده الكتيبه دلوقتي حالا انشالله بالفانله واللباس
انا : يافندم والله ماعندي عساكر فاضيه هي العساكر دي هاتعمل ايه
هو : هايلعبوا َماتش كوره..
انا بحده : ماتش كوره يافندم احنا هانحارب ولا ها نلعب كوره
هو: ياسياده النقيب بلاش مناهده معايا وابعت العساكر فورا وزي ماقلتلك ان شالله باللباس والفانله
ملحوظه :
كان قائدي العظيم عندما ينادي الضابط برتبته يبقى خلاص قد وصل إلى مرحله توقيع الجزاء عليه اما لو ناداه بأسمه يبقى الواحد في الأمان.. 😂
انا : حاضر يافندم
واغلقت الخط ورميت السماعه في الأرض َمغتاظا
المهم عينت ال١٠ عساكر وارسلتهم الي قياده الكتيبه وهم بالفانله واللباس وحافيين بقياده عريف من أحب المجندين الي قلبي هومحمد يونس على يونس....!!!!!!!
في الساعه الثانيه بعد الظهر عادوا وحضر العريف محمد لاعطائي التمام بعودتهم ودارت هذه المحادثه....
هو: تمام يا فندم وصلنا كلنا
انا: عملتوا ايه يامحمد
هو: لعبنا ماتش كوره مع منتخب الجيش التاني يافندم
انا : وعملتوا ايه في الماتش
هو: طبعا كسبنا يافندم ٣/صفر وانا جبت جون....... ثم صمت لبرهه واستطرد بخبث مااصل احنا كلنا زملكاويه زي سيادتك يافندم ثم اطلق ضحكه عاليه وانا معه واعلى صوتا منه...
هاهاهاهاهاهاهاهاهاي 😂😂
اتاري الموضوع كان من ضمن خطه الخداع للعدو وانا زي الحمار مش فاهم حاجه...
هاهاهاهاهاهاهاهاي 😂😂😂
ايام العزه والفخر والمجد...
انتهت
2
-2
