في منتصف هذا العام وعلى وجهه التحديد في شهر يوليو اتصل بي قائد الكتيبه الجديد ودارت هذه المحادثه الغامضه بيننا....
هو: انا قررت ابعت لك هديه هاتوصل لك مع عربيه تعيين العشاء
انا: هديه ايه يافندم؟؟؟؟
هو: هاتعرفها لما توصلك.
انا: شعرت انه كان يضحك أثناء هذه المحادثه ولكني طردت هذا الشعور من ذهني...
كان مركز قياده سريتي يقع على تبه تعتبر أعلى التباب الموجوده في المنطقه ويصل ارتفاعها لحالي ١٠٦ متر(=عماره مكونه من ٣٢دور)وهذه التبه من الرمال الناعمه جدا ولا تستطيع اي عربه الصعود عليها وهذه التبه تسمى ابو وقفه لمن يعرف هذه المنطقه ممن خدموا معي واذكره بها..
في تمام العاشره مساءا وصلت عربه التعيين المهكعه الي أسفل التبه ونزل جنودي إليها ليستلموا تعيين العشاء ثم صعدوا ومعهم ضابط احتياط قصير القامه وقمحي اللون وعلى شفته العليا شارب كثيف ويحمل مخله مهمات على كتفه ويبدو عليه الإرهاق الشديد حتى أنه كان مغمض نصف العينان ووقف أمامي وكنت ساعتها جالسا مع رفيقي المؤتمن الملازم اول شوقي بدير.. صعب عليا وقبل ان يتكلم بادرته بقولي مش عايز منك اي كلام دلوقتي والتفت الي شوقي وقلت خده ياشوقي يتعشى وينام الليله دي معاك في ملجئك وبكره الصبح الساعه ٧ تجيبه وتجيلي....
وفعلا في تمام السابعه من صباح اليوم التالي وصل شوقي وضابط الاحتياط الجديد وجلس شوقي بجانبي وهو أمامي ودار هذا الحوار العشوائي بيننا والذي لم يحدث معي طوال مده خدمتي مع هذه الشخصيه الغريبه والعجيبه......
انا: حمدالله على السلامه
هو:الله يسلمك يا فندم
انا: اسمك ايه؟؟؟؟
هو: اسمي خليل مهران محمد ابو خليل وسموني كده على اسم خالي البيه اصل هو كبير الخلايله وكبيرنا.
انا: منين ياخليل.
هو: من رشيد يافندم ومن عيله الخلايله ومعظمنا بأسم خليل على اسم خالي البيه..
انا: فطرت النهارده الصبح قبل ماتيجيلي
هو: ايوه يافندم بس في الحقيقه لسه جعان.
انا: التفت الي شوقي قائلا هو الفطار كان ايه النهارده ياشوقي
علشان انا لسه مافطرتش
شوقي: كان جبنه نستو وبيض وحلاوه وجرايه يافندم.....
وقفه قصيره :
التعين في القوات المسلحة مشبع جدا لأي فرد فيه ومحسوب بدقه شديده وبسعرات حراريه تتناسب مع المجهود اللذي يبذله الفرد المقاتل فالجنه النستو كانت تصنع تصنيع خاص بالقوات المسلحه وتأتي على هيئه قرص قطره ٥سم وارتفاعه ١سم ومن احلى مااكلت في حياتي كلها والحلاوه كان نصيب الفرد منها ١٠٠ جرام والجرايه عباره عن ٣ ارغفه لليوم والرغيف الواحد وزنه ١٣٠جرام وقطره حوالي ٢٥سم
وفي بعض الأحيان تستبدل الجبنه النستو بجبنه بيضاء دمياطي والحلاوه بعلبه مربي صغيره تصنيع خاص بالقوات المسلحه من شركه قها او شركه ادفينا والبيض يستبدل بفول مدمس او عدس....
انا: يابني بيكفي اي واحد وانا شخصيا ماقدرش أكمله عموما ياشوقي اديله الفطار بتاعي كماله له..
شوقي: ليه يافندم كل واحد يكيف نفسه على التعيين الميري
انا: معلش ياشوقي النهارده بس
شوقي : حاضر يافندم
انا: طيب نمت كويس
هو: والله يافندم نمت نوم متقطع اصل خالي البيه قالي اني هاتتعب شويه لغايه ماتتعود على الوضع الجديد
انا:هو خالك البيه ده كان في الجيش
هو: ايوه يافندم خالي البيه كان امباشي في حرب ٤٨ وكان بيخدم في اورطه مدفعيه
انا: اورطه..؟؟!!!!!! هو من ايام الاورطه
هو:ايوه يافندم خالي البيه دخل الحرب ودخل فلسطين كمان بس اليهود أسروه وقعد في المعتقل ١٤ شهر لغايه ما الصليب الأحمر أتدخل وافرجوا عنه
انا: الصليب الأحمر أتدخل علشانه ولا علشان تبادل الأسرى من الطرفين
هو: ايوه يافندم علشان الأسرى كلهم بس خالي البيه كان كبيرهم
انا: وانت بقى عايز تبقى زي خالك البيه واليهود يأسروك وتروح المعتقل زيه
هو: صمت ولم يرد
انا : هو خالك البيه واخد رتبه البهويه.
هو: ارتبك وصمت ولم يرد
انا : انت فتحت مخلتك اللي جايبها معاك ولا لسه
هو: لا لسه يافندم اصل خالي البيه قالي ماتفتحش المخله بتاعتك الا لما تستقر في المكان
انا: طيب كويس بس ياسيدي لما تيجي عربيه تعيين الغدا تاخد مخلتك اللي لسه مافتحتهاش زي ماقاللك خالك البيه وتركب العربيه وترجع قياده الكتيبه وتقول لقائد الكتيبه الرائد طلبه بيقول لسيادتك انه مش عايز هدايا ومتنساش تاخد خالك البيه في ايدك وانت ماشي.....
هاهاهاهاهاهاهاهاهاهاهاها
انتهت
ملحوظه:
١:هذا البوست منقول من دفتر يومياتي والذي كنت اسجل فيه ما يحدث خلال يومي وكنت افر فيه اول امس فقررت كتابته
٢: هذا الضابط لم يستمر في الكتيبه سوي يومان فقط ونقل منها ولم احاول معرفه الي اين ذهب ولم اقابله طوال مده خدمتي في اي مكان بداخل الفرقه الثانيه المشاه ولم أسعى الي ذلك....
المجد لجيش مصر... وتحيا مصر الوطن.
2
-2
