تجربتي مع التأمين الصحي.. لم اصدق

الحمد لله يوم الخميس زي النهارده كتبت عن معاكسات فلكيه بطاقات سلبيه صعبه ويوم السبت كنت انا اول المبتلين والحمد لله على كل شيء

قمت من النوم شويه نرفزه على شويه زعيق مع الاولاد وبعدين حسيت بوجع في منتصف الصدر وحرقان ومش بيخف لكن بيزيد والحمد لله اني نزلت فورا على مستوصف الراعي الصالح انا وابني وبعد التحديث والفحوصات اكتشفوا انها جلطه في القلب وقاموا بعمل اللازم ادويه كثير واقراص كثيره والحمد لله ذابت الجلطه ووجهنا الى المستشفى العام حيث ان بها مركز رعايه للقلب على مستوى عالي جدا في دمنهور وعند وصولنا للمستشفى كانت العنايه فائقه واهتمام وتم اجراء كل الفحوصات والتحاليل ورسم القلب وما الى ذلك ثم تم احتجازي في قسم رعايه القلب وبعد فتره اخبروني انها جلطه في القلب وسوف عاى ان تجرى عمليه قسطره وتركيب دعامه مساء نفس اليوم وتمت العمليه بحمد الله وبقيت ثلاث ايام اخرى في المستشفى للمتابعه والعلاج

....

بعد ما فوقت سالت ابني هل دفعت فلوس قال لا لكنهم اخذوا بطاقه الرقم القومي وسالت الممرضه هو احنا فين بالضبط هل ده قسم استثماري في المستشفى ما هو مش ممكن ده يكون مجاني ومستشفى حكومي لان فعلا مستوى محترم جدا في كل شيء بصراحه اجهزه على اعلى مستوى اطباء على اعلى مستوى مكان نظيف جدا يعني حاجه تبهر بصراحه

الممرضه قالت لي لا طبعا مش مجاني هو طبعا مدفوع لكن حضرتك او اي مريض مش بيدفع حاجه اذا كنت حضرتك تابع للتامين الصحي فلتامين بيدفع تكاليف العلاج  بصراحة كانت مفاجاه كبيره جدا جدا بالنسبه ليا للتامين الصحي او اي نظام تامين ثاني برضه بتدخل وبتتعالج تاخذ واجبك تمام التمام والدوله بتدفع النفقات تحت بند العلاج على نفقه الدوله

 

بصراحه كانت مفاجاه كبيره جدا جدا بالنسبه لي وما كنتش اعرف عنها اي حاجه وان فعلا في تطور كبير في منظومه التامين الصحي انا موظف في الشركه قطاع عام من سنه 1982 وعمري ما استخدمت دفتر التامين الصحي لانه طول عمره سيئ السمعه وزحام ومشاكل وطوابير ودور وبهدله وفعلا لم استفد من هذا الدفتر نهائي

لكن اللي بيحصل النهارده وانا شفته بعيني وعشت التجربه لا فعلا كلام في منتهى الاحترام صراحه لغايه ما عشت التجربه دي كانت قناعتي ان المنتمين للجيش او للشرطه او للقضاء وبعض المؤسسات الخاصه هم فقط من يتم علاجهم ورعايتهم والاهتمام بهم وطبعا ده كان موجود لغايه قريب جدا لكن اللي انا شفته بيقول ان حتى انت لو مش بتنتمي ليه او للشرطه او للقضاه او لغيرهم وهتحتاج علاج الدوله هتعالجه وعلى مستوى عالي ومش هتموت بسبب انك مش معك تكاليف العلاج

الحقيقه انا مش باحب اشيل الناس همي واشتكي واكتب عن ابتلاءات او غيره لان دائما شايف ان الناس فيها اللي مكفيها ومش بحب اشارك فيه الاخبار السلبيه لكن انا فعلا باكتب عشان في خبر ايجابي وهو التطوير اللي حصل في منظومه التامينات واهتمام الدوله بكل افرادها ومواطنيها ودي عن تجربه شخصيه وبعد كدا ما حدش يقول لك لا هما بس بتوع الجيش وبتوع الشرطه وبتوع القضاء اللي الدوله بتراعيهم وتظبطهم عشان تسكتهم وتكسب ودهم وخلاص لا يا حبيبي الزمن دهوت ولا والله فعلا والله والمواطن المصري بدا فعلا الكلام ده عن تجربه شخصيه

مهندس طارق سالم المسيري

مهندس استشاري مدني

 

وعقبال لما يضبطه المعاشات المدنيه كمان لانها حاجه تكسف جدا ولا تليق ابدا

دمنهور في ٦ اكتوبر 2022