تفحصت حساب قديم ليا على النت ؛

الغريب إن البيدچ كلها بتدور حول شخصين يليهم خمسة ستة ،عدد يتعد على صوابعك ،

حياتي معاهم وليهم 

حكايات وحياة 

تهريج وكأن العالم كله هم ... هم وبس

      خمس سنين من حياتك فاصل زمن ، أتغير فيهم كل شئ 

 لما دخلت قلت ؛ سبحان مقلب مقامات الناس في القلوب 

     ممكن في أي لحظة كل شئ يتهد ومع المعافرة والشد والجذب .... تلاقي نفسك بقيت لوحدك 

    الصورة فضت وال كنت فاكرهم أعز الناس ،

   مشيوا وفاتوك 

ممكن كان بينا ود ، بس الأكيد مكنش كافي 

ود لمة حلوة ، ود حياة هنية ، ود عابر وعادي 

ود تلاشى عبر الزمن ،واهي منزوع الجذور 

  ود ذهب مع الريح 

  إزاي الناس تكون محطات في حياتنا 

إزاي كل عابر ياخد مننا حتة ووقت وحب 

إزاي ممكن نشوف بعض ونعدي عادي 

 إحنا بشر وربك قادر يداوي