-
عمرك جربت تكون في البيت والميه قطعت يومين او ثلاثة من غير م تكون عامل حسابك
طبعا الناس في الارياف زمان كانوا متعودين انهم يملوا ميه من الصهاريج في قلل وزلع ويملوا الزير ويعيشوا حياتهم
بس طبعا الوضع في المدينه مختلف
اولا لانك اتعودت ان الميه موجودة
ثانيا لان مفيش صهاريج تملي منها لما الميه المتخزنه في البيت تخلص
وطبعا الاحساس بقطع الميه بيختلف من دور لدور
زمان مكنش فيه اختراع اسمه مواتير سحب الميه
فلما الميه كانت بتقطع عند سكان الادوار العليا تسمع اللي ...ينادي
يا ام صلااااااااااح اقفلي ياختي الحنفية شويه عاوزة اغسل المواعين
ترد عليها ام صلاح
معلش يام يوسف والنبي الميه قطعة من الصبح وابوصلاح صحي الصبح ملقاش ميه راح يغسل وشه في الشغل
بس طبعا الوضع دلوقت اختلف بسبب اختراع اسمه ماتور سحب الميه
بالنسبه لساكن الدور الاول الميه بتوصل له من غير ماتور لكن لما حد من جيران الادوار العليا يشغل الماتور الميه تختفي من عند ساكن الدور الاول
تخيل بقي لما الميه قطعت ايه اللي بيحصل
طبعا ام صلاح اللي ساكنه في الدور الاول فتحت الحنفيه قبل م سكان الادوار العليا يشغلوا المواتير
وقفت قدام الحنفيه دقيقة واتنين....ربع ساعة تقريبا
منزلتش ولا نقطة ميه وبسرعة بسرعة عملت اتصالاتها باعطال الميه وعرفت ان ماسورة ميه في النطقة مكسورة وبيصلحوها وحيقطعوا الميه لمدة ثلاث ايام وبسرعة راحت لما كل الجراكن اللي في البيت وشيلت لصلاح وابوه وقالت لهم الميه قاطعة تقبوا وتغطسوا وتجيبو لي ميه ياما مفيش طبيخ
طبعا ابو صلاح وابنه اخدوا الجراكن وراحو يدوروا علي ميه في المساجد والجيران خارج المنطقة
شوفوا بقي سكان الادوار العليا بيعملوا ايه
طنط حسنيه صاحبه البيت ساكنه في الدور الثالث عندها ماتور بقوة 900 حصان يعني بيسحب الميه من عمق الارض شغلت الماتور جابلها ميه متعرفش منين وعماله تغسل وتنشر فتكات اللي في الدور اللي فوقها عروسه جديدة شغلت الماتور وفتحت الحنفيه وفضلت تستني الميه تنزل مفيش
بصت من البلكونه لقت طنط حسنيه غاسله منشرة وغسيلها مبلول
راحت جاريه علي مرسي جوزها
مرسي ....مرسييييييي
مرسي يرد عليها نعم يا حبيبتي مالك
ترد عليه بغيظ وجازة علي سنانها
مرسي قوم الماتور بايظ
يقوم مرسي مفجوع
ايه بايظ دانا لسه مسددتش تمنه
ترد عليه بعصبيه انت بتكلمني كدا ليه
تعالي صلحه بسرعة
يقوم يدخل الحمام ويضغط علي زر الماتور يسمع صوت صفارة ومفيش ميه بتنزل
يدخل المطبخ ويجرب نفس التجربه قال يعني النتيجة ممكن تختلف من المطبخ للحمام
وبعدين يقرر انه ينزل المنور علشان يشوف المشكله فين وطبعا لم ينس المفكات والمفاتيح لزوم التصليح
وطبعا فتكات واقفة من شباك المطبخ قال يعني بيلاغوا بعض يخبط علي الماتور خبطتين
وينادي شغلي كدا
تشغل ومفيش ميه بتنزل
يخبط في حته تانيه وينادي
ترد مفيش
وبعدين ينادي الماتور سليم
ترد تقوله الميه طالعة عند صنط حسنيه كويس
ينظر للارض مسلم امره للله وبعدين يمسك المفتاح
يفك ويربط وبعدين ينادي شغلي كدا
ترد عليه مفيش ميه
طنط حسنيه عندها ميه وبتغسل اهيه
يضرب عينه علي ماتور طنط حسنيه وهو واقف في المنور وفتكات تنظر له من شباك المطبخ وام صلاح كانت واقفة في بلكونه المنور ومتابعة الموقف وعنيها علي ماتور طنط حسنيه ولما لاحظت ان مرسي اتضايق واتخنق نظرت اليه بخبث وقالت له الميه قاطعة في المنطقة كلها علشان بيصلحوا ماسوره مكسورة
يشعر مرسي بالراحة بعد سماع هذه الكلمات ويضرب عينه ناحيه ماتور طنط حسنيه وفتكات في الشباك ثم ينسحب من المنور
فجاه يرتفع صوت صفير يليه طوت فحيح وبعدين طقطقة مكتومه ويتصاعد الدخان
ويبحث الجميع عن مصدر هذا الصوت
ماتور طنط حسنيه اتحرق
يا خوانا الميه قاطعة
- 🔻
-
- بقلم: سوزان بهنسي
- ◀️: مدونة سوزان بهنسي
- الزيارات: 1096
- رقم التوثيق: 1089
2
-2
