سفروتة عايشة معانا على سطح كوكب الأرض اللطيف ده وعلشان احنا بشر مش ملايكة والملايكة مبتغلطش لكن مين فينا من البشر معصوم من الخطأ وخير الخطائين التوابون..بس سفروتة مش بتفوت أي غلطة لمضة لماضة ولسانها ده أطول منها يعني طوله مترين:p
سفروتة كل يوم أو كل أسبوع أو كل شهر على حسب مزاج سيادتها هتحكيلنا قصة من قصص البشر الحياتية اليومية اللي مكريسكوبها الشخصي هيلقطه هتبلغ عنه فورا ..
وعلشان سفروتة بنت مصرية أصيلة وجدعة ..هتحكيلنا باللغة العامية الباحتة اللي هتشوفه عينها بس ممكن يجي الدور في يوم من الأيام عليها وتكون بطلة من بطلات اليوميات وعلى رأي المثل لا تعاريني ولا عاريك الهم طايلني وطايلك
]أو ل يومياية "أول حكاية"
السلام هو أول الكلام
السلام عليكم يابشر,,,
من فينا مش متضايق , من فينا مش طهقان
وعلى رأي الفنان العالمي ريكو " طهقان مخنوق مضايق , قرفان زهقان مش رايق"
هى دي طبيعة الدنيا وهى دي الحياة
واللي مش عجبه
يخبط راسه في الحيط ويقول يارتني ما جيت
بس مش بإيدينا , ولا من فينا بيختار
وعلشان مش نحتار
خلينا نعيش بإستهتار
نعم,, ايه قولتولي بإستهتار ازاي ؟؟!!
انا هقول لكم على الطريقة واسمعوا الحكمة من ......
أحم , أحم
أوعى حد يكمل , انا بهدد على فكرة
أقصد اسمعوا الحكمة سفروتة المكبوتة
عيشوا بإستهتار
يعني عيشوا بلامبالاة علشان تضمنوا تبعدوا عن امراض الضغط والسكر والذي منه ,,,
يعني لما تصحى الصبح وتدخل التواليت علشان تعمل حاجة كل الناس بتعملها امر طبيعي وفطري عادي يعني
تلاقي الميه مقطوعة , تبتسم وتقول وماله أكيد بتحصل كتير!!!!
لما تخرج من التواليت وأخوك يدخل يلاقي الميه رجعت عادي عادي ابتسم!!!
لما تنزل الشارع وتفضل واقف 7 ساعات علشان تلحق مكان في الاتوبيسات المكيفة
ولا علشان تلحق الدرجة الأولى الفخمة في المترو وبعد ده كله متلقيش مكان ابتسم,
وبعد كده توصل الشغل وانت في كامل أناقتك , لاطرطشت عليك شوية ميه مجاري من عربية سايقاها هانم من الهوانم
ولا طفل برئ داس على رجلك وانت ماشي " طفل لذيذ يعني من اللي بالي بالكوا" لأ خالص
ولا الكمسري عدي عليك وانت واقف في الاتوبيس خمسين مرة رايح جاي
ولا سواق التاكسي كان نفسه يدوس عليك بالأربع عجلات , ايه اللي خلاك تضطر في الآخر تركبه مش كده استهتار وبكده ضيعت الماهية في الاجرة مش مهم. المهم انك توصل في كامل أناقتك "ابتسم"!!!!
لأ وبعد ده كله مديرك يبقابلك بإبتسامة حانية رقيقة كلها حنية ومش عايز بعد ده كله تبتسم ,ايه ياأخي هتتبطر على النعمة
ابتسم وتأكد إن الحياة وردية..بص للنص المليان خليك متفائل
ايه يعني لما تتأخر عن الشغل ..ايه يعني لما لبسك يتبهدل اللي اشتريته ب5 الاف جنيه مرتب الشهر اللي فات:p
ايه يعني لما يتخصم من مرتبك الضخم يومين تلاتة عادي جدا ابتــــــــــــــــسم
أوعى الضحكة تفارق وشك البشوش ده حتى العلم بيقول ان الضحك بيطول العمر والكآبة والزعل بتجيب أمراض
وعلى رأي المثل اضحك كركر أوعى تفكر يوم تكشر
ابتسم وعيش ببرود , ابتسم وعيش بلا مبالاة
أحم ,أحم...
على فكرة الحالة اللي أنت فيها تستدعي إنك تروح لدكتور نفساني
نعم!!!!
دكتور نفساني ليه هو أنا اتجننت خلاص
..............
أكيد,أكيد هيكون ده رد فعلك لما حد ينصحك إن تروح لدكتور نفساني
ليه بيتصور لنا إن اللي عقلهم ترالالي هما اللي بيروحوا للدكتور النفساني؟
طيب ليه لما نسمع ان حد زار اللهم احفظنا الدكتور النفساني :d
بنحاول نبعد عنه بقدر المستطاع ؟
ليه بنعتبره كإنه شاذ عن القاعدة, بنعتبره مش مننا من المتحولين اللي عينيهم بتحمر بليل وبيمصوا في دم الغلابة
مع إن أغلبنا ,ده إذا مكنش كلنا محتاجين فعلا نعمل زيارة للدكتور النفساني شهريا ده لو مكنش أسبوعيا
ما هو اللي الواحد بيشوفوا في الدنيا دي مش قليل
خناق وزعيق وزحمة ومية مقطوعة واللحمة, ياااااه فاكرين اللحمة بقالنا زمان مشفنهاش
وحشتنا ريحتها, سايبة فراغ كبير في حياتنا بنت الإيه "يلا دنيا ومبدومش"
طيب نعدي ده كله وياعيني على بناتك ياأم الخير اللي واقفين في طابور العنوسة
المفروض إن الطابور يقل واحدة تخرج والتانية تدخل مكانها
لاااااااااااا, طابور العنوسة من الثوابت مبيتغرش
لأ لأ لأ ده كلام ثوابت ايه , ياريته كان من الثوابت , ده دوال متغيرة لكن في زيادة مستمرة
عامل زي العشوائيات كده وعامل زي توك توك العاصمة يتوغل وينتشر
عين وصابتنا والله ,
ده غير اللي بيحصل الأيام دي ..(احنا اسفين ياريس..احنا مش اسفين ياريس )وحرب دايمة بين الطرفين وال ايه احنا في زمن الديمقراطية والتعبير عن وجهة نظرنا بحرية
طيب فين الحرية الشخصية دي
ايه يعني لما واحد يقول للريس انا اسف ..اسف على المزهلة اللي حصلتلك
عادي ياجماعة take it easy
الراجل قلبه رهيف صعبان عليه اللي حصل ومشفش اللي حصل لجاره ,مشفش ناس بتموت من الجوع مشفش ناس مش لاقية مليم تصرفه على ولادها
عادي جدا دي وجهة نظره وهو حر ..يقول اسف ولا مش اسف أهم حاجة الحرية في التعبير عن الرأي
..والناس اللي بتقول ان الثورة حققت فوضى كبيرة وسمحت لكل من هب ودب يتحكم فينا
..صح كلامهم منطقي بصراحة انا معاهم على أساس ان قبل الثورة مكنش فيه حوادث طرق وده معتبرش فوضى ولا كان فيه جرايم قتل واختطاف وده ما اسموش فوضى ابدا
ده تدريب الناس على قوى الشر
وبعد ده كله مش عايزنا نروح لدكتور نفساني!!!
ده المفروض يعملوا لنا عرض جديد " دكتور نفساني ومعاه كتب
فرويد في علم النفس هدية ويوجد لدينا خدمة توصيل للمنازل" :p
2
-2
