^^وحشتيني يامصر ^^

أخبارك ايه وأخبار كل حد
ياااه وحشتينى يامصر بجد
وحشني عم عبده البقال
ومينا ومحمد وجمال
ولعبنا وشقاوتنا واحنا اطفال
فاكر لما كسرنا شباك عم كمال
فاكر ضحكنا من القلب ونط الحبال
ولعب الكورة مشتاق انا ليها
وشوارع حارتنا وكل شبر فيها
حاجات كتير ف غربتي كنت عايش بيها
وزفة وزغاريد تملى المكان
وبيت صغير بحس فيه بالامان
ونسمة عصاري ولمة جيران
في حضن اهلي بحس بطعم الحنان
فاكر هروبنا من المدرسة
فاكر صحبة حلوة وناس كويسة
وبنت جيرانا الحلوة ام الضفاير
فاكر لما كنت بعاكسها من ورا الستاير
ونفضل نحب على اغاني ام كلثوم
ويسهرنا الشوق ولا نعرفش نوم
كل الناس بتقول ياامي انك طيبة
بس ساعات بتبقى بعيدة عننا وساعات قريبة
وساعات بتخدينا في حضنك وبتحسي بدموعنا
وساعات كتير بتبقى انتي سبب وجعنا
وبدل ما تنوري نهارنا بشمسك
بتطفي شموعنا
مصر الكلام مصر السكات
مصر زحمة سوق يوم التلات
مصر القلل مرصوصة ف البلكونات
مصر الدفا مصر الوفا فى عز الازمات
مصر اللى مسببالي بحر الاهات
مصر الخضار وغناوى البنات
مصر الاساطير وحكايات
ومدندش بيعزف لحنها على الربابة
مصر ناسها الطيبين والغلابة
مصر صندوق مليان ذكريات
مصر المجروحة والجارحة
مصر اللي مهما عملنا فيها مسامحة
رجعتلك يامصر من تاني
رجعتلك وعرفت قد ايه كنت اناني
رجعت وقلبي ندمان
رجعت ياأم الطيبة والحنان
سامحيني وتعالي ياأمى
في احضـــــــاني