و عجبى...رباعياتى بقلمى

هذه محاولة منى لتقليد رباعيات العبقرى جاهين انا عارفة مهما اكتب أكيد مش هوصل ليه طبعا بس حاولت وجربت بس حاسة انى فشلت المهم ياريت تقولوا رأيكوا بجد ولو فيه حاجة ممكن تتظبط من قافية أو معنى ياريت تقولوا لى لأن هدخل بالرباعيات
دى مسابقة ومش عايزة أخسررررر...
................................

على شط النيل ياحبيبتى أنا وأنتى قاعدين
الهوا ياخدنا ويجبنا شمال ويمين
على شط النيل ياحبيبتى وقفنا محتارين
ياترى أنتى أنا وأنا أنتى ولا احنا مين
وعجبى
__________

فى ناس تحب وتلاقى قلبها يبقى مليان
وناس بتحاول تحب وحاسة بالحرمان
ما هى الدنيا دى فيها ناس وناس
واللى يفكر فيها كتير ينصاب بالجنان
وعجبى
____________

عروستى مكسورة ومرمية
ماهى ياما شافت من الدنيا آسية
مقطوعة ومن الزمن بالت
وبقت لا تنفع أنتيكة ولا حتى هدية
وعجبى
____________

الاأونا..ألادوس..ألا تريس
باع ضميره وجاب لبنته عريس
عريس متريش بس شعره أبيض
ياعينى عليكى يابنتى أتبعتى بالرخيص
وعجبى
____________

ليه يااخوات واخدين العراك سبيل
ما تحاولوا تخلوا الحب والصلح بديل
بصوا لى باستعجاب وقالوا
ماهو من قبلنا قابيل قتل هابيل
وعجبى
____________
سألنى الزمان سؤال وقال علل
دور واكتشف وجاوب وحلل
ليه الغلبان مش لاقى رغيف
قلت الحمد لله ان لسه فى مخلل
وعجبى
__________
ياما نصحتك كتير ولا أنت سمعتنى
قلبى صرخ عليك وبحياتى موتنى
دلوقتى راجع تندم ليه يابن بطنى
مسمعتش كلامى ومن العذاب رحمتنى
وعجبى
____________
قلبى آسى من الدنيا كتير
زهق وطلب دكتور تخدير
بص لى بنظرة غريبةوقال
يلزمك حباية طيبة وحباية خير
وعجبى
__________
مسمار من كتر الدق على راسه صرخ وقال لأ
صاحبه بص له بنظرة غضب وقام رميه من الشق
بصيت لرميته واستغربت من حاله
ازاى قدر يقول كلمة حق
وعجبى
_________
عجوز وبص فى المراية لشعره الشايب
وقال ياترى دى ميزة ولا ده عايب
قال لأ اللون الأبيض أكيد ميزة
ولا يمكن اتغير وبقى عيبة ما هى دنيا عجايب
وعجبى
________
حبيبتى مصر عروس النيل
لابسة الطرحة وفستانها الطويل
على نغماتك اتربى حليم وثومة
يابلدى ياأصل الشجن والمواويل
________
صراخ وزعيق وخناق ودنيا زحمة
وناس كتير وشوشها مفيهاش رحمة
وناس تجرى وتهرب وكأنها فى سباق
وناس تانية فى لخمة وبردوا وشوشها شاحبة
وعجبى
_________
قمارتى بيشرب ويصرف فى ثروته
ما أبوه الباشا ونفرتيتى تبقى عمته
عينه على الحقيقة متغمية من سنين
خسر كل حاجة وكانت دى قاضيته
وعجبى
________
حياتى كلها بقت خوف وقلق
زى حمل عن فريقه افترق
دورت على أصحاب وحبايب
لكن رجعت لوحدى ولاقيتنى فى ملأ
وعجبى
_______
فات عليا عيد وعيد وبعديه عيد
والقلب خالى وعايش وحيد
ايه أمنيتك ياقلبى للسنة دى
قالى يكون لى حبيب ولو حتى بعيد
وعجبى
________
سيبها على ربنا والكارثة أكيد هتمر
ليه تنحب عليها وايش عرفك انه شر
خليها تعدى وبلاش تقعد تحسبها
ولا حد فينا هيموت ناقص عمر
وعجبى
_______
قربى ياهانم قرب يابيه دى الدنيا دى مزاد
فيها الطيبة وفيها خير وفيها شر وفيها فساد
فيها اللى اتباع بالرخيص وفيها اللى اتعفف
ما الدنيا دى أنواع بس فى الاخر كلنا عباد
وعجبى
_______
فين أميرة وحسام وباقى الناس
كنا لمة كبيرة ومالنا أساس
بصيت حواليا أدور عليهم
لاقيتنى لوحدى فى دنيا الخلاص
وعجبى
_______
حرامى دخل بيتنا وقالى هسرقك
هتسرق ايه ياحسرة دى المظاهر بتخدعك
فاكرنى مبسوط جاى يسرق منى الفرحة
ده حياتى كلها مبسمعش فيها غير كلمة بودعك
وعجبى
_______
حياتى عبارة عن صفحتين فى كتاب
صفحة فرح وسعادة وصفحة عذاب
ما هى الدنيا كده يوم بسمة ويوم دمعة
واللى يقول غير كده يبقى كداب
وعجبى..
_________
فى ناس فاكرة بفلوسها تقدر تذلنا وبس
ما هما بياكلوا لحمة واحنا بناكل عدس
أوعوا تفتكروا فى يوم ممكن تكسرونا
ده احنا مهما كنا لسه عندنا عزة نفس
وعجبى